NATO Dağlıq Qarabağ münaqişəsi ilə bağlı narahatlığını bildirib

Bakı/23.11.17/Turan: Dağlıq Qarabağda dondurulmuş münaqişənin hərbi həll yolu yoxdur və NATO onun nizamlanmasında bilavasitə rol oynamır. Bununla belə, Cənubi Qafqazdakı vəziyyət alyansın narahatlığına səbəb olur, bu barədə NATO-nun baş katibi Yens Stoltenberq noyabrın 23-də Brüsseldə Azərbaycan prezidenti İlham Əliyevlə birgə mətbuat konfransında bildirib.

NATO rəhbəri Bakı və Yerevan arasında dialoqun bərpasını yüksək qiymətləndirib. Hər iki ölkənin prezidentlərinə müraciət edən baş katib onları bundan sonra da bu yoldan getməyə çağırıb. "Biz sizi hər hansı yeni gərginlikdən uzaq durmaq üçün danışıqlar vasitəsilə həll gedən yolu davam etdirməyə çağırırıq", deyə "İnterfaks" agentliyi Stoltenberqin bəyanatından sitat gətirir. Onun sözlərinə görə, Şimali Atlantik Alyansı Dağlıq Qarabağ münaqişəsinin nizamlanması üçün formalaşdırılmış ATƏT-in Minsk Qrupunun işini dəstəkləyir.

Azərbaycan prezidenti İlham Əliyevin Brüsseldə Şimal Atlantik Alyansının qərargah-mənzilində NATO baş katibi Yens Stoltenberqlə görüşü Azərbaycan liderinin Belçikaya işgüzar səfəri çərçivəsində baş tutub. Əliyev həmçinin Şimali Atlantik Alyansın təmsil olunan 29 ölkənin səfirləri ilə görüşüb.

NATO baş katibi Azərbaycana alyansın Əfqanıstanda təhsil və hökumət qüvvələrinə yardım etmək məqsədi daşıyan "Qətiyyətli dəstək" missiyasında iştirakına görə təşəkkür edib, Bakının gələn il bu əməliyyatda iştirak edən hərbçilərinin sayını artırmaq qərarını təqdir edib.--0--