NATO Rusiyanı ən böyük təhlükə hesab edir

Vaşinqton/29.06.22/Turan: Çərşənbə günü Madriddə NATO sammitində Rusiya NATO üzvlərinin sülh və təhlükəsizliyinə "ən ciddi və birbaşa təhlükə" elan edilib. Bu barədə sammitin yekunlarına dair bəyanatda deyilir. Sənəddə Moskvanın strateji tərəfdaşdan təhlükəyə çevrildiyi vurğulanır.

NATO liderləri Rusiyanın hücumuna qarşı mübarizə aparan Ukraynaya “siyasi və praktiki dəstəyi artırmağa” söz veriblər. Onlar həmçinin rəsmi olaraq Finlandiya və İsveçi alyansa üzv olmağa dəvət ediblər.

“Bu gün biz Finlandiya və İsveçi NATO-ya üzv olmağa dəvət etmək qərarına gəldik və qoşulmaq haqda protokolları imzalamağa razılaşdıq. Sammit beynəlxalq düzənin möhkəmləndirilməsi üçün müttəfiqlər və tərəfdaşlarla birgə səyləri inkişaf etdirməyə imkan verir”, - Ağ Evin informasiya bülletenində deyilir.

"Prezident Bayden ABŞ-ın NATO-nun 5-ci maddəsinə sarsılmaz sadiqliyini bir daha təsdiqləyib. Bu maddəyə əsasən birinə hücum hamıya hücum deməkdir. Müttəfiqlərin böyük yeni töhfələrilə yanaşı, prezident sammitdə NATO-nu dəstəkləmək və müttəfiqlərimizə qarşı hər hansı təcavüzün qarşısını almaq üçün ABŞ yeni qüvvələr və vasitələrin Avropada yerləşdirilməsini də elan edəcək”.

Ağ Evin məlumatına görə, NATO-nun yeni Strateji Konsepsiyası NATO-nun 2021-ci il sammitində qəbul edilmiş NATO-nun 2030-cu ilə qədərki gündəliyinə uyğun dəyişiklikləri əks etdirir. Orada həmçinin NATO-nun çəkindirmə və müdafiə, böhranların qarşısının alınması və idarə olunması,  birgə təhlükəsizlik kimi əsas vəzifələri əksini tapıb.

Rusiyanın Ukraynaya qarşı təcavüzü nəticəsində Avropada yaranmış daha təhlükəli vəziyyətə cavab olaraq NATO öz müdafiə planlarını fəallaşdırıb və indi NATO-nun bilavasitə komandanlığı altında 40 000-dən çox hərbçi var. Müttəfiqlər həmçinin NATO-nun şərq cinahında hərbi qrupları iki dəfə artıraraq, Baltik dənizlərindən Qara dənizə qədər güclü müdafiəni təmin ediblər.

Sammitdə liderlər quru, hava, dəniz, kiberməkan və kosmosu əhatə edən yeni müdafiə konsepsiyasını, həmçinin alyansın şərq cinahında döyüş qabiliyyətinin gücləndirilməsini təsdiqləyəcəklər. ABŞ Avropaya 20 000-dən çox əlavə qüvvə çıxararaq öz hərbçilərinin ümumi sayını 100 000-ə çatdırıb.

Bu gün Bayden bəyan edib ki, ABŞ NATO və Avropa təhlükəsizliyinin gücləndirilməsi üçün aşağıdakı əlavə tədbirləri görəcək:

- Polşada V korpusun daimi qabaqcıl komanda qərargahının yaradılması;

- Sonradan şərq cinahında yerləşdirilmə imkanı ilə Rumıniyada yeni briqadanın yerləşdirilməsi;

- Baltik regionunda zirehli qüvvələrin, aviasiya, hava hücumundan müdafiə və xüsusi təyinatlı qüvvələrin geniş şəkildə yerləşdirilməsi, müttəfiqlərin təlimi;

- İspaniyada yerləşən Amerika esmineslərinin sayının 6-dək qədər artırılması;

- Böyük Britaniyada F-35 təyyarələrinin iki eskadrilyası;

 - Almaniya və İtaliyada əlavə hava hücumundan müdafiə vasitələrinin yerləşdirilməsi.

Müttəfiqlər həmçinin Bosniya və Herseqovina, Gürcüstan və Moldovanın müdafiə ehtiyaclarına dair genişləndirilmiş dəstək proqramlarını təsdiqləyəcəklər. 0