Noyabrın 13-dən dekabrın 22-nə qədər ermənilər 1061 öldürülmüş əsgərinin cəsədini toplayıb

Bakı/23.12.20/Turan: Son beş həftə ərzində ermənilər Qarabağda və onun ətrafında döyüş əməliyyatları zonasında 1061 hərbi qulluqçunun cəsədini tapıb toplayıblar. Bu barədə Ermənistan KİV-ləri məlumat yayıb. Bu, Azərbaycanın erməni əsgərlərin valideynlərinin Cəbrayıl, Füzuli, Şuşa, Ağdərə (Mardakert), Xocavənd (Martuni) və Hadrutda axtarış aparmasına icazə verməsindən sonra mümkün olub.

Demək olar ki, hər gün onlarla cəsədin tapılıb Ermənistan tərəfə verildiyi barədə məlumat verilir. Həlak olanların bir hissəsini tanımaq mümkün deyil, onları Ermənistana DNT-analizə göndərirlər. 

Həlak olanların axtarışında Qırmızı Xaç Komitəsinin nümayəndələri və Rusiya sülhməramlıları da iştirak edir. Onlar Azərbaycan tərəfi ilə danışıqlar aparırlar.

Bir müddətdir Ermənistan tərəfi həlak olan hərbiçilərin sayı haqqında məlumat yaymır. Açıqlanan sonuncu rəsmi rəqəm 3 min nəfərdir. Amma bu məlumat hələ bir ay əvvəl verilib. Ermənistan itkin düşmüş şəxslərin sayını da açıqlamır.

Azərbaycan 2800 nəfərin həlak olduğunu, 40-a yaxın hərbiçinin isə itkin düşdüyünü bildirib. -02D-