Obama Slavyansk əməliyyatını dəstəkləyib və Rusiyanı yeni sanksiyalarla hədələyib

ABŞ prezidenti Barak Obama Rusiyanı yeni sanksiyalarla hədələyib.  CNBC telekanalı bildirib. “Əgər Rusiya rəhbərliyi kursu dəyişməsə, diplomatik və iqtisadi təcridlə üzləşəcək”, - Ağ Evin rəhbəri bəyan edib. O həmçinin Kiyevin Slavyanskda  əməliyyatını dəstəkləyib. Obama Ukrayna ordusunun şərqə ilk böyük hücumunu Kiyevin  regionda “qayda-qanun yaratmaq” cəhdi kimi qiymətləndirib.

Bu gün amerikalı lider AFR  kansleri Angela Merkel ilə görüşüb. Görüşdə Ukrayna böhranı müzakirə olunub.

Merkellə birgə keçirilən mətbuat konfransında Obama bildirib ki, münaqişə getdikcə güclənərsə Qərbin Rusiyaya qarşı əlavə sanksiyalar tətbiq etməkdən başqa seçimi olmayacaq. “Gələcək sanksiyalar qaçılmazdır”, - Merkel razılaşıb.

Hər iki lider işarə ediblər ki, Qərbin növbəti addımı Rusiya iqtisadiyyatının ayrı-ayrı sektorlarına, əsasən hərbi-sənaye kompleksi və energetika sektorlarına məhdudlaşdırıcı tədbirlərin tətbiqi olacaq.

Obamanın fikrincə, Rusiya prezidenti Vladimir Putin “indiki kursdan imtina etməlidir”.

Krım kampaniyası başlayandan və Rusiya-Ukrayna münasibətləri kəskinləşəndən ABŞ və Aİ Rusiya məmurlarına və biznesmenlərinə qarşı sanksiyalar tətbiq ediblər. Hazırda ABŞ-ın Maliyyə Nazirliyinin sanksiya siyahısında 43 rusiyalı (Krım məmurları daxil olmaqla) və 19 hüquqi şəxs, Avropa İttifaqının siyahısında isə 48 rusiyalı siyasətçi və biznesmen var.  -02D-