“Özbəkistan-Azərbaycan-Türkiyə” dialoq formatının iclasında Daşkənd bəyannaməsi imzalanıb

Bakı/02.08.22/Turan: Daşkənddə üç ölkənin xarici siyasət, ticarət, iqtisadiyyat və nəqliyyata cavabdeh olan nazirliklərinin rəhbərlərinin iştirakı ilə “Özbəkistan-Azərbaycan-Türkiyə” dialoq formatının birgünlük iclası başa çatıb. Bu barədə Nuz.uz bildirib.

İlk iclasın nəticələrinə görə, Özbəkistan Respublikasının xarici işlər nazirinin səlahiyyətlərini icra edən Vladimir Norov mətbuata açıqlama verib.

O, görüşün uğurlu keçdiyini deyib və belə bir qarşılıqlı fəaliyyət formatının yaradılması təşəbbüsünə görə Azərbaycan tərəfinə, dəstəyə görə türkiyəli tərəfdaşlara təşəkkürünü bildirib.

“Dövlətlərimizin başçılarının siyasi iradəsi və müəyyən etdikləri kurs sayəsində bu gün Özbəkistanın Azərbaycan və Türkiyə ilə əlaqələri bütün əməkdaşlıq tarixində olduğundan ən yüksək səviyyədədir”, -Norov deyib.

Noyabrda Özbəkistanda keçiriləcək Türk Dövlətləri Təşkilatının birinci sammitinə hazırlığın gedişi müzakirə edilib.

Üç ölkənin nümayəndələri Birləşmiş Millətlər Təşkilatının mərkəzi əlaqələndirici rolu ilə Əfqanıstanın sülh yolu ilə bərpası üçün beynəlxalq birliyin səylərinin davam etdirilməsinin vacibliyi barədə razılığa gəliblər.

Görüş iştirakçıları iqtisadiyyat, ticarət, investisiya qoyuluşu və nəqliyyat, o cümlədən bütün növ nəqliyyat və tranzit kommunikasiyaları sahələrində əməkdaşlıq potensialının tam reallaşdırılması üçün birgə səylər göstərməyə hazır olduqlarını bildiriblər.

Bu məqsədlə Bakı-Tbilisi-Axalkalaki-Qars dəmir yolunun bütün imkanlarından, o cümlədən Türkiyə və Azərbaycanın beynəlxalq limanlarından, həmçinin “Şimal-Cənub” və “Şərq-Qərb” beynəlxalq nəqliyyat dəhlizlərindən fəal istifadə olunması nəzərdə tutulur.

“Tərmez-Məzari-Şərif-Kabil-Pişəvər” strateji dəmir yolu xəttinin tikintisi üzrə Özbəkistanın təşəbbüsünün əhəmiyyəti etiraf edilib. Tərəflər “Özbəkistan-Qırğızıstan-Çin” dəmir yolunun tikintisini də dəstəkləyiblər.

Daşkənddə Özbəkistan, Azərbaycan və Türkiyənin xarici işlər, iqtisadiyyat və nəqliyyat nazirlərinin ilk görüşünün yekunlarına əsasən  Daşkənd Bəyannaməsi imzalanıb. Sənəddə yaxın perspektivlər üçün əsas prioritetlər müəyyən edilib. 0--