Paşinyan ATƏT MQ-dən izahat tələb etmək niyyətindədir

Bakı/28.03.19/Turan: Qarabağ nizamlanmasının üç prinsipini və altı elementini təklif edən ATƏT-in Minsk Qrupunun həmsədrləri onları özləri şərh etməlidirlər ki, tərəflər bu prinsip və elementlərin onlar üçün məqbul olub-olmadığını deyə bilsinlər. Bu barədə cümə axşamı Ermənistan parlamentində çıxış edən baş nazir Nikol Paşinyan bildirib.

"Mənim üç prinsip və altı element haqqında, əlbəttə ki, çox mühüm suallarım var və iki gün sonra danışıqlar prosesi baş tutacağına görə mən bu sualları yerində verəcəyəm və əlbəttə ki, sonra məmnuniyyətlə sizə bu sualların nə olduğunu və onlar haqqında hansı təəssüratlarım olduğunu danışacağam. Bu şərhlər bizim üçün vacibdir, çünki Azərbaycanın bu prinsiplərlə bağlı verdiyi şərhlər bizim üçün məqbul deyil. Bu prinsiplərin izahının belə olduğu aydın olarsa, artıq dediyim kimi, bu, bizim üçün qəbuledilməzdir. Amma, bəlkə də həmsədrlər Azərbaycanın şərhinin yanlış olduğunu deyəcəklər.

Həmsədrlərin şərhini eşitmədən, bu prinsiplərin bizim üçün məqbul olub olmadığını necə deyə bilərəm? Mən deyirəm: bu prinsipləri təklif edən özü onları şərh etsin, mənim bununla bağlı suallarım var. Və sonra, bu prinsipləri təklif edənlər bu sualları cavablandırdıqda, təkcə biz deyil, Azərbaycanda bunun məqbul olub olmadığını deməlidir", deyə "Azadlıq" radiosu Paşinyandan sitat gətirir.

Xatırladaq ki, martın 29-da Vyanada ATƏT-in Minsk Qrupunun həmsədrlərinin iştirakı ilə Paşinyan-Əliyev görüşü keçiriləcək. -02D-