Paşinyan ayrıca bir ölkədə kommunizm qurmaq qərarına gəlib

Bakı/06.08.19/Turan: Ermənistanın baş naziri Nikol Paşinyan ölkəsinin 2050-ci ilə qədər strateji hədəflərini elan edib. Avqustun 5-də Qarabağda keçirilən mitinqdə çıxış edərkən o bildirib ki, 2050-ci ilə qədər Ermənistan əhalisini 5 mln. nəfərə çatdırmaq, 1,5 mln. iş yeri açmaq, yoxsulluğu aradan qaldırmaq, Ermənistanı sənaye ölkəsinə çevirmək, ÜDM-i 15 dəfə artırmaq, dəyəri 10 mlrd. dollardan çox olan ən az 5 texnologiya şirkətinə və 10 min işləyən startapa malik olmaq, orta əmək haqqını 7 dəfə artırmaq, ordunun döyüş qabiliyyəti indeksinə görə ilk iyirmi ölkə arasına daxil olmaq, dünyada 10 ən səmərəli kəşfiyyat xidmətindən birinə malik olmaq, səhiyyə xidmətlərinin 100% əlçatanlığını təmin etmək və bu sahənin maliyyələşməsini 20 dəfə artırmaq, təhsili milli həyat tərzinə çevirmək və elm və təhsilin maliyyələşməsini 20 dəfə artırmaq, Ermənistana gələn turistlərin sayını 15 mln. nəfərə çatdırmaq, Ermənistanın futbol üzrə yığmasını Avropa və / və ya dünya çempionatının mükafatçısına çevirmək, 25 olimpiya qızıl medalı və şahmat üzrə dünya çempionu rütbəsi qazanmaq lazımdır.

"Əminəm ki, indi çoxunuz sual edirsiniz: bəs niyə Artsax haqqında heç nə deyilmədi? Cavab çox bəsitdir: Çünki Artsax Ermənistan deməkdir, nöqtə", deyə "Azadlıq Radiosu" Paşinyandan sitat gətirir.

Baş nazir Ermənistan hakimiyyətinin bu qədər böyük vəzifələri necə həyata keçirmək niyyətində olduğunu izah etməyib. Xankəndində meydana toplaşmış minlərlə insan Paşinyanın çıxışına kifayət qədər süst reaksiya verib və yalnız onun son ifadəsindən sonra sevinclə qışqırıblar. -02D-