Paşinyan: Azərbaycan Ermənistandan demokratiya yayılmasından qorxur

Bakı/13.07.18/Turan: Azərbaycan Ermənistanda hakimiyyət dəyişdikdən sonra daha da aqressivləşib. Bu barədə Ermənistanın baş naziri Nikol Paşinyan cümə axşamı NATO-nun qərargah-mənzilində keçirilən brifinqdə bildirib.

"Təəssüf ki, Ermənistanda demokratiya və demokratik inqilabın tərəqqisindən sonra Azərbaycan daha da aqressivləşib və bu aqressiya təkcə Ermənistana qarşı deyil, həm də regionumuzda demokratiyaya qarşı yönəlib", deyə Paşinyan qeyd edib.

"Baş nazir vəzifəsinə daxil olduğum ilk günlərdən etibarən Dağlıq Qarabağla sərhəddə, habelə Ermənistan-Azərbaycan sərhədində gərginliyin artdığını gördüm. "Qeyd etmək istərdim ki, Azərbaycanın Ermənistana qarşı istənilən təcavüzü təkcə Ermənistana qarşı deyil, həm də demokratiyaya qarşı təcavüzdür. Hesab edirəm ki, Azərbaycan prezidentinin demokratik proseslərin Ermənistandan Azərbaycana yayıla biləcəyi ilə bağlı narahatlıqları var və belə başa düşürəm ki, onlar demokratiya dalğasının Ermənistandan Azərbaycana hərəkətinin qarşısını almaq üçün gərginliyi artırmağa çalışırlar", deyə Paşinyan bildirib.

Bu sözləri şərh edən Azərbaycan XİN-in rəsmi nümayəndəsi Hikmət Hacıyev Ermənistan-Azərbaycan sərhədində və qoşunların təmas xəttində gərginliyin artması haqqında iddiaları "yalan" adlandırıb. Ermənistan rəhbərliyi beynəlxalq ictimaiyyəti aldatmağa çalışır. "Paşinyan Ermənistanla heç bir əlaqəsi olmayan demokratiya və insan hüquqlarından danışaraq, qeyri-demokratik yolla, dövlət çevrilişi ilə hakimiyyətə gəlişinə bəraət qazandırmaq istəyir. Biz Ermənistan rəhbərliyinə ayılmağı və reallıqları dərk etməyi tövsiyə edərdik", deyə Hacıyev qeyd edib. -02D-