Paşinyan Azərbaycanı kommunikasiyaları bağlı saxlamaqda və sülh danışıqlarını pozmaqda ittiham edir

Bakı/28.06.22/Turan: Ermənistan baş naziri Nikol Paşinyan iyunun 27-də bir sıra bəyanatlar verib, Azərbaycanı sülh prosesini və kommunikasiyaların açılması prosesini pozmaqda ittiham edib. O, yerli KİV-lərin suallarını cavablandırarkən bildirib ki, Brüsseldə Azərbaycan prezidenti ilə dəmir yolunun tikintisi haqqında razılaşma əldə olunub. Amma Azərbaycan razılaşmadan imtina edib, eyni zamanda, yazılı sənəddən də imtina edib.

"Azərbaycan prezidentinin apreldə Brüsseldə keçirilən görüşümüzdən bir neçə saat əvvəl verdiyi Ermənistan ərazisindən keçən yolların Laçın dəhlizi ilə eyni məntiqlə fəaliyyət göstərməli olduğu haqqında bəyanat bizim üçün qəbuledilməzdir", deyə Paşinyan bildirib.

"Üçtərəfli bəyanatda hər şey aydındır və orada yalnız bir dəhlizdən bəhs edilir, bu da Rusiya sülhməramlılarının nəzarəti altında olan Laçın dəhlizidir", deyə o, sözünə davam edib.

Daha sonra baş nazir Azərbaycanı ikitərəfli görüşü pozmaqda ittiham edib. "İyunun 27-də görüş keçirilməli idi, amma Azərbaycan tərəfindən ləğv edildi. Biz gələcək işin planlaşdırılması üçün xarici işlər nazirləri səviyyəsində görüş təklif etdik. Hazırda bizə heç bir cavab verilməyib", deyə baş nazir bildirib.

Laçın dəhlizinin fasiləsiz işinin təmin edilməsi Rusiya sülhməramlılarının məsuliyyətidir, deyən Paşinyan əlavə edib ki, Ermənistan ən yüksək səviyyədə məhz belə olacağına təminat alıb. Laçından yan keçən yeni yolun tikintisinə toxunan baş nazir deyib ki, marşrut dəyişdiyi təqdirdə DQMV-nin keçmiş sərhədlərinə daxil olmayan ərazilər Azərbaycanın nəzarəti altına keçəcək. O, ermənilərin Laçından və yolun keçdiyi Zabux kəndindən çıxmayacaqlarına eyham edib. Onun sözlərinə görə, tərəflər marşrutun dəyişməsini müzakirə ediblər. "İlkin razılaşmalar əldə olunub. Bu dəyişikliyin məqsədi Dağlıq Qarabağ və Ermənistan arasında daha etibarlı, möhkəm əlaqəni, daha yaxşı yol əlaqəsini təmin etməkdir. Marşrut Rusiya sülhməramlılarının yeni marşrut üzərində nəzarəti bərqərar etməsindən sonra dəyişməlidir", deyə Paşinyan bildirib.

Gələcək sülh sazişi haqqında suala cavabda Paşinyan deyib ki, Bakı və Yerevan "sül sazişi ilə bağlı ideyaları bir neçə dəfə müzakirə ediblər və müəyyən ediblər ki, hələ qarşılaşdırmaq, sülh sazişinin hansı formatda, hansı sürətlə hazırlanmalı və hansı müddəaları ehtiva etməli olduğunu başa düşmək lazımdır". O, Azərbaycanın Ermənistanın guya sülh sazişi ilə bağlı danışıqları ləngitməsi haqqında bəyanatlarını qəribə adlandırıb.

"Bu bəyanatlardan sonra Ermənistan XİN Azərbaycan XİN-ə xarici işlər nazirlərinin görüşünü keçirmək və gələcək proseslərlə bağlı razılaşma əldə etməyə çalışmaq təklifi göndərib. Əvvəlki müzakirələr zamanı Ermənistan və Azərbaycanın vəzifəli şəxslərinin gələcək işi təşkil etmək üçün bir-biri ilə əlaqə və ünsiyyət saxlamalı olduğu qərarına gəlinib. Amma Azərbaycan bu razılaşmaları boykot edib, XİN-in təklifinə də cavab verməyib", deyə o bildirib.

Daha sonra baş nazir Azərbaycanı ikitərəfli görüşləri pozmaqda ittiham edib. "İyunun 27-də görüş keçirilməli idi, amma Azərbaycan tərəfindən ləğv edilib. Görüş Ermənistan Təhlükəsizlik Şurasının katibi və Azərbaycan prezidentinin müşaviri səviyyəsində keçiriləcəkdi, amma Azərbaycan tərəfi imtina edib", deyə baş nazir qeyd edib.

Rəsmi Bakı hələlik Ermənistan liderinin bu ittihamları ilə bağlı şərh verməyib. 02D