Paşinyan bir gündən sonra Əliyevə cavab verməyi qərara alıb

Bakı/19.04.20/Turan: Cümə günü Ermənistanın baş naziri Nikol Paşinyan Azərbaycan rəhbərliyinin ünvanına ittihamlarla çıxış  edərək Bakının Qarabağ nizamlanmasında kompromislərdən imtina etdiyini bildirib.

Qarabağ separatçıları rəhbərliyinin də iştirak etdiyi Ermənistan Təhlükəsizlik Şurasının iclasında Paşinyan deyib ki, “danışıqlar prosesində real irəliləyiş gözləməyə dəyməz, xüsusilə də bu, müharibə və ya erməni xalqına qarşı birbaşa və ya dolayısı ilə ərazi və ya tarixi tələblərin irəli sürülməsi ilə müşayiət olunursa”.

“Əminəm ki, Qarabağ münaqişəsini uzunmüddətli genişmiqyaslı Ermənistan-Azərbaycan düşmənçiliyinə -xalqlarımızın bir-birinin hər şeyini – keçmiş, gələcək və bütün regionu mübahisələndirməsinə- çevirmək cəhdləri  nə erməni,  nə də Azərbaycan xalqlarının maraqlarına uyğun deyil”, - o, qeyd edib.

Sonra Paşinyan təhdidlərə keçərək bildirib ki, Ermənistan və Qarabağla hərbi münaqişə Azərbaycana dövlətçiliyin itirilməsinə başa gələ bilər.

“Güc tətbiqi nəticəsiz qalmayacaq və ona cavab hər zaman həm hərbi, həm də siyasi baxımdan adekvat olacaq. Bunu faktiki olaraq özünü dalana dirəyən Azərbaycan prezidenti İlham Əliyev də başa düşür. 15 ildən artıqdır ki, o, öz xalqına Qarabağ münaqişəsini hərbi yolla həll etməyi vəd edib, bu bəhanə ilə milyardlarla dollar xərclənib ki, bu da sonda offşor zonalarda tanınmış insanlara məxsus hesablarda pulların yuyulması təəssüratı yaradıb. Və

indi də öz xalqına izah edə bilmir ki, nə üçün reallıq belədir, olduğu kimidir. O anlayır ki, onun mümkün avantürası nəinki Azərbaycana qaçılmaz ziyan vuracaq, həm də onun antidemokratik hakimiyyətini məhv edəcək”.

Son zamanlar Azərbaycan xüsusi xidmət orqanlarının göstərişi ilə “Qərbi Azərbaycan” təşəbbüsü işə salınıb və Ermənistan Respublikası nəzərdə tutulur”, - Paşinyan deyib və bunu bütün regionda sabitliyi pozan “absurd təşəbbüs” adlandırıb.-02D-