Paşinyan: “Ermənistan şərqdən qərbə dəmir və avtomobil yollarının tikintisinə hazırdır

Bakı/22.04.22/Turan:  Moskva səfəri zamanı regional kommunikasiyaların açılması məsələsində mühüm razılaşmalar əldə edilib. Bu barədə Ermənistanın baş naziri Nikol Paşinyan cümə günü hökumətin iclasında bildirib.

"Ermənistan qısa müddətdə şərq və qərbi Ermənistan ərazisilə birləşdirən dəmir yolunun və avtomobil yolunun tikintisinə başlamağa hazırdır", - o deyib, ancaq konkret marşrutları dəqiqləşdirməyib.

"Biz regional təhlükəsizlik və sabitlik məsələlərinə xüsusi diqqət yetirdik", - Paşinyan deyib və ümidvar olduğunu bildirib ki, Ermənistan, Rusiya və Azərbaycan baş nazirlərinin üçtərəfli işçi qrupu yaxın vaxtlarda kommunikasiyaların açılmasına başlamaq üçün lazımi sənədləri hazırlayacaq.

Bu bəyanatda avtomobil yolunun çəkilişini qeyd etmək vacibdir, çünki daha öncə Yerevan bundan qaçırdı. Əslində, söhbət Yerevanın hər vəchlə qəbul etmədiyi Zəngəzur dəhlizinin reallaşdırılmasından gedir. -02D-