Peskov Putinin Paşinyanın məktubunu alıb-almadığını bilmir

Moskva/17.05.21/Turan: Rusiya Bakı və Yerevanla daim əlaqə saxlayır, Ermənistan və Azərbaycan sərhəddində gərginliyin aradan qaldırılması üçün səy göstərir. Bu barədə rusiyalı liderin mətbuat katibi Dmitri Peskov bazar ertəsi jurnalistlərə bildirib.

Ötən həftə Ermənistan baş naziri səlahiyyətlərini icra edən Nikol Paşinyan parlamentin növbədənkənar iclasında Putinə məktub yazdığını bildirib. O, Azərbaycanla sərhəddə Sünik vilayətində vəziyyətlə bağlı yardım, o cümlədən hərbi yardım istəyib.

"Bilirsiniz ki, Rusiya və Ermənistan daim əlaqədədir. Həmçinin biz Bakı ilə daim əlaqə yaradırıq. Prezident üçtərəfli razılaşmaların yerinə yetirilməsinin tərəfdarıdır. Hazırda gərginliyin aradan qaldırılması və vəziyyətin düzəldilməsi üçün ciddi səylər göstərilir", -  Peskov deyib.

Kremlin nümayəndəsi “Rusiya prezidenti hərbi yardımla bağlı Paşinyanın məktubunu alıbmı” sualına cavab verməyə çətinlik çəkib. "Mən sizə dəqiq deyə bilmərəm, amma bütün bu məsələlər təbii ki, ikitərəfli əlaqələr zamanı dəfələrlə müzakirə olunub", - Peskov bildirib. -02D-