Polad Aslanov 15 saylı cəzaçəkmə müəssisəsində hüquqlarının pozulmasından şikayət edir

15 saylı cəzaçəkmə müəssisəsində saxlanılan xeberman.com saytının rəhbəri Polad Aslanov rəis müavininin kabinetindən və onun iştirakı ilə ailəsinə zəng etməyə məcbur edilir.

Aslanov bunu şəxsi həyat hüququnun pozuntusu kimi qiymətləndirir, bu barədə Turan-a onun həyat yoldaşı Gülmirə Aslanova bildirib.

O xatırladıb ki, Polad noyabrda aclıq elan etdikdən sonra 1 saylı cəzaçəkmə müəssisəsindən 15 saylı cəzaçəkmə müəssisəsinə köçürülüb.

"Cəzaçəkmə müəssisəsinin rəisi bildirib ki, indi evə yalnız rəis və ya rəis müavininin kabinetlərindən zəng edəcək. Polad saxlanma şəraitinin pis olmasından danışmağa başlayan kimi əlaqə kəsilir", deyə həyat yoldaşı qeyd edib.

Polad saxlanma şəraitinin pis olması barədə yalnız 21-24 yanvar tarixlərində uzun görüş zamanı danışa bilib. Belə ki, cəzaçəkmə müəssisəsində təyin edilmiş 1146 nəfər yerinə 1500 məhbus saxlanılır. Çarpayı çatışmadığına görə bəzi məhbuslar yerdə yatırlar. Eyni zamanda, şəraiti məqbul olan kameralar bağlı saxlanır.

"Bu kameralardakı yerlər məhbuslara satılırdı. İndi bu qadağan edilib, buna görə administrasiyanın stimulu yoxdur və kameraları bağlı saxlayırlar. 

Elə bu səbəbdən məhbuslara tibbi yardım göstərilməsindən də imtina edilir. Polad məhbusları şikayət etməyə çağırdıqda o, təzyiqə məruz qalır", deyə Aslanova bildirib.

Polad həmçinin cəzaçəkmə müəssisəsinin hamamında isti su olmadığını, hamam otağının isə soyuq olduğunu, məhbusların normal çimə bilmədiyini bildirib.

G.Aslanova həyat yoldaşının şikayətləri ilə əlaqədar ombudsmana müraciət edib. 

Bundan əvvəl hüquq müdafiəçiləri tərəfindən siyasi məhbus kimi tanınan bloger Rəşad Ramazanov da 15 saylı cəzaçəkmə müəssisəsində məhbusların hüquqlarının pozulduğunu və şəriatin pis olduğunu bildirib.

* Polad Aslanov 12 iyun 2019-cu il tarixində İranın xeyrinə casusluq ittihamı ilə - CM-in 274-cü (dövlətə xəyanət) maddəsi ilə həbs edilib. O, 16 il azadlıqdan məhrumetmə cəzasına məhkum edilib.

Aslanov bütün ittihamları rədd edir, xüsusi xidmət əməkdaşları arasında korrupsiya faktlarını ifşa etdiyinə görə təqib edildiyini bildirir.

Hüquq müdafiəçiləri onu siyasi məhbus kimi tanıyıblar. Sonradan Ali Məhkəmə Aslanovun həbs müddətini 13 ilə qədər azaldıb. AİHM onun həbsinin qanunsuz olduğunu təsdiq edib və təzminat təyin edib.