Amnesty İnternational hesabatında Azərbaycanda insan hüquqları sahəsində vəziyyətin pisləşdiyini qeyd edir

Amnesty İnternational beynəlxalq təşkilatı Azərbaycanla bağlı dərc etdiyi yeni hesabatında ölkədə insan hüquqları sahəsində vəziyyətin pisləşməsindən narahatlığını bildirib. 

"Fikri ifadə etmək, birləşmək və dinc toplaşmaq azadlığı hüquqları əsassız olaraq məhdudlaşdırılır, hüquq müdafiəçilərinə və jurnalistlərə qarşı repressiyalar törədilir", deyə məruzədə bildirilir.

Ədalətli məhkəmə hüquqlarının pozulması və məhkəmədən siyasi məqsədlərlə istifadə geniş şəkildə yayılıb. 

Eyni zamanda hüquq müdafiəçilərinin və hökumətin tənqidçilərinin - Anar Məmmədli, Qubad İbadoğlu, Tofiq Yaqublu, Rüfət Səfərov, İqbal Əbilov və Bəhruz Səmədovun əsassız həbs edildiyi bildirilir.

Həmçinin, bu yaxınlarda Meydan TV-nin altı jurnalistinin həbs edilməsindən bəhs edilir. 

Məruzənin daha bir hissəsi məhbuslara qarşı işgəncə, amansız rəftar və tibbi yardım göstərilməsindən imtinaya həsr olunub. 

"Həbs yerlərində işgəncələr və digər amansız rəftar növləri geniş yayılıb və polis və istintaq orqanlarının əməkdaşları tərəfindən törədilir. Müstəqil şikayət mexanizmi, həmçinin qurbanların ədalətli məhkəmə və səmərəli müdafiə vasitələrinə çıxışı yoxdur. 

Hökumətin, demək olar ki, bütün tənqidçiləri həbsxanada işgəncə və amansız rəftar haqqında məlumat verir. Bu şikayətlər səmərəli şəkildə araşdırılmır", deyə sənəddə bildirilir. 

Nümunə kimi Abzas Media-nın jurnalistləri Sevinc Vaqifqızı və Nərgiz Absalamovaya qarşı təzyiqdən bəhs edilir.

Eyni zamanda, həbs edilmiş bir neçə jurnalist və fəalın səhhətlərində ciddi problemləri var və onlara zəruri tibbi yardımın göstərilməsindən imtina edilir.

Amnesty İnternational Azərbaycanda toplaşmaq azadlığının məhdudlaşdırılmasına da diqqət çəkir, "on ildən çoxdur ölkədə dinc etirazların faktiki olaraq qadağan edildiyini" qeyd edir.

Azərbaycanda insan hüquqları sahəsində vəziyyətin yaxşılaşmasının heç bir əlaməti yoxdur, deyə məruzədə qeyd edilir. Sənəddə beynəlxalq ictimaiyyətə "Azərbaycanda insan hüquqlarının sistemli və ciddi pozuntularını qətiyyətlə pisləmək" çağırışı yer alır.