Polis aksiyaya müdaxilə edib, saxlanılanlar var

Bakı/11.04.19/Turan: Aprelin 11-də bir qrup ictimai fəal inzibati həbsdə olan Bayram Məmmədova verilmiş işgəncələrə etiraz olaraq "Siyasi məhbuslara azadlıq!", "İşgəncələrə son!" şüarları ilə aksiya keçirib.

Polis və mülki geyimlilər aksiyaya müdaxilə ediblər, reportyor Fatimə Mövlamlı və Gülnarə adlı bir xanım, digər bir gənc saxlanılaraq Nizami rayon 25 saylı polis bölməsinə aparılıb.

Aksiyada iştirak edənlər polis və mülki geyimlilərin bu hərəkətlərinə etirazlarını bildiriblər:"30 ildir torpaqlar işğaldadır, erməniyə bu gücü göstərmirlər, öz vətəndaşlarına göstərirlər. Budur bunların islahatları".

Aksiya iştrakçıları B.Məmmədova işgəncə verilməsinə etirazlarını ifadə ediblər: "Bayram cəzasını çəkib, azadlığa buraxılıb, yenidən 30 sutka inzibati cəza verilib. O buraxmağınız nədir, bu tutmağınız nədir. Üstəlik, hələ saxlandığı müvəqqəti təcridxanada işğəncəyə də məruz qalıb. Odur ki, biz siyasi məhbuslara azadlıq və işgəncələrə son şüarı ilə baş verənlərə etirazımızı ifadə edirik. Belə olmaz, buna son qoyulmalıdır".

Xatırladaq ki, B.Məmmədov 2016-cı il mayın 10-da saxlanılıb. Külli miqdarda narkotik maddənin qanunsuz dövriyyəsində ittiham edilib. Amma B.Məmmədov ittihamı qəbul etməyib, Heydər Əliyevin heykəli üzərinə "Qul bayramınız mübarək!" şüarını yazdıqlarına görə həbs olunduqlarını bildirib. Digər siyasi fəal Qiyas İbrahimli ilə birgə 10 il azadlıqdan məhrum edilib. 2019-cu il martın 16-da əfv fərmanı ilə hər ikisi azadlığa çıxıb. Bundan sonra bu il martın 29-da, azadlığa buraxıldıqdan 13 gün sonra B.Məmmədov polisin qanuni əmrinə tabe olmamaqda təqsirli bilinərək Sabunçu Rayon Məhkəməsinin qərarı ilə 30 sutka inzibati cəzaya məhkum edilib və Binəqədi müvəqqəti saxlama təcridxanasına aparılıb. Aprelin 2-də Apellyasiya Məhkəməsində keçirilən iclasda B.Məmmədov təcridxanada işgəncələrə məruz qaldığını bildirib. Daha sonra onda başgicəllənmə və qusma hallarının olması barədə məlumatlar yayılıb. B.Məmmədov təcili ekspertizadan keçirilməsini istəyir. -0-