Polis şənbə mitinqinin təşkilatçılarına xəbərdarlıq edib

Bakı/22.09.17/Turan: Müxalifətin şənbə mitinqinin təşkilatçıları Bakı şəhər Baş Polis İdarəsinə çağırılıblar və onlara nümayişlə bağlı xəbərdarlıq edilib.

Paytaxt polisinin verdiyi məlumata görə, hüquq mühafizəçiləri qarşıdurma və iğtişaşlara gətirib çıxara biləcək əməllərin qarşısını alacaq, təşkilatçıları isə cəzalandıracaqlar.

Aksiyanın keçirilməsi haqqında meriyaya göndərilmiş bildirişdə qeyd edilməyən şüarların səsləndirilməsinə görə də eyni tədbirlər görüləcək.

Demokratik Qüvvələrin Milli Şurasının (DQMŞ) təşkil etdiyi mitinq sentyabrın 23-də saat 15.00-dan 17.00-a qədər Yasamal rayonu stadionunda (əvvəlki adı "Məhsul") keçiriləcək. Xalq Cəbhəsi Partiyasının lideri Əli Kərimlinin verdiyi məlumata görə, aksiya "landromat" qalmaqalı ilə əlaqədar keçirilir. Söhbət OCCRP beynəlxalq jurnalist araşdırmaları şəbəkəsinin 2012-2014-cü illərdə Azərbaycandan çirkli pulların yuyulması və lobbiçilik fəaliyyətinə görə ödəniş məqsədilə 2,9 mlrd. dollar çıxarılmasından gedir. DQMŞ Baş Prokurorluqdan bu faktların araşdırılmasını tələb edir. -06D-