Qarabağ Azadlıq Təşkilatı erməni deputaların Bakıya gəlməsinə etiraz edib

Bakı/22.09.17/Qarabağ Azadlıq Təşkilatının bir qrup fəalı Ermənistan parlamentinin deputatlarının Bakıya gəlməsinə etiraz olaraq Azərbaycan Milli Məclisinin qarşısında aksiya keçirib. Bu barədə Qarabağ Azadlıq Təşkilatının mətbuat xidməti məlumat yayıb.

Məlumatda deyilir ki, aksiya iştirakçıları ermənilərin qatıldığı tədbirin keçirildiyi Milli Məclisin qarşısında toplaşaraq, "Rədd olsun işğalçı Ermənistan nümayəndələri!", "Erməniləri dəvət edənlərə ar olsun!", "Ermənilər Bakını dərhal tərk etsinlər!" və digər şüarlar səsləndirib, plakatlar qaldırıblar.

Polis müdaxilə edib və aksiyanı dağıdıb.

Aksiya iştirakçılarının bəyanatında deyilir ki, erməni deputatların Bakıda keçirilən Avronest Parlament Assambleyasının iclasına dəvət olunmaları, onların iştirakına şərait yaradılması şəhidlərin ruhuna təhqir, bütün Azərbaycan xalqına xəyanətdir.

"Nə qədər ki, torpaqlarımız işğal altında, qız-gəlinlərimiz əsirlikdə, Dilqəm Əsgərov və Şahbaz Quliyev kimi soydaşlarımız girovluqdadır, ermənilərin hər hansı ad altında Azərbaycana, paytaxtımıza gətirilməsi yolverilməzdir. Bu praktikaya birdəfəlik son qoyulmalıdır. Biz işğalçı Ermənistan rejiminin təmsilçilərini, bu həyasız deputatların dərhal konfransdan çıxarılmasını, onların Azərbaycandan dərhal rədd olub getmələrini tələb edirik", deyə sənəddə qeyd edilir.

Bakıda Azərbaycan Milli Məclisinin, Avronest Parlament Assambleyasının Sosial məsələlər, Təhsil, Mədəniyyət və Vətəndaş Cəmiyyətləri üzrə komitəsinin, Əhali və İnkişaf üzrə Avropa Parlament Forumunun və BMT-nin Azərbaycandaki ofisinin birgə təşkilatçılığı ilə "Dayanıqlı İnkişaf Məqsədləri üzrə gender bərabərliyinin və qadın sağlamlığının təşviqinə dair Şərq Tərəfdaşlığı Ölkələri Parlamentlərinin cəlb edilməsi" mövzusunda keçirilən konfansda Ermənistan parlamentinin deputatları Mane Tandilyan və Armen Aşotyan iştirak edirlər.-0--