Prezident İlham Əliyev: “Azərbaycan Ermənistanla sülhə tərəfdardır, ancaq düşmən revanş barədə düşünürsə, sərt cavab alacaq”

Bakı/13.04.21/Turan: Azərbaycanın Dağlıq Qarabağ və Ermənistan ermənilərinə qarşı hərbi planları yoxdur. Əgər erməni tərəfin də qarşılıqlı istəyi olarsa, Bakı Yerevanla sülh sazişi imzalamağa hazırdır. Lakin əgər Ermənistanda revanşist əhval-ruhiyyə vüsət alarsa, Azərbaycan düşmənə təkrar sarsıdıcı zərbə endirməyə hazırdır. Bu barədə prezident İlham Əliyev çərçənbə axşamı ADA Universitetində keçirilən "Cənubi Qafqaza yeni baxış: münaqişədən sonra inkişaf və əməkdaşlıq" adlı beynəlxalq konfransdakı çıxışında bildirib.

O, iştirakçıların suallarını cavablandırarkən deyib: "Qarabağda yaşayan ermənilərə qarşı güc tətbiq etmək planlarımız yoxdur. Dediyim kimi, Qarabağ münaqişəsi qurtarıb. Azərbaycan Rusiya sülhməramlılarının nəzarət etdikləri ərazilərdə yaşayan erməniləri öz vətəndaşları hesab edir. İndiyədək göstərdiyimiz humanitar yardım və maddi-texniki dəstək də bizim niyyətimizi göstərir", - İlham Əliyev deyib.

Əsasən Azərbaycan humanitar məsələlərin həlli üçün Rusiya sülhməramlılarına öz dəmir yolu vasitəsilə nəqliyyat-logistika yardımı göstərir.

"Mən başqa nümunələr də göstərə bilərəm. Biz "Qazprom"a icazə verdik ki, Rusiya ərazisində təmir işlərilə əlaqədar Azərbaycan vasitəsilə Ermənistana qaz nəql etsin. Bu, növbəti işarədir, jestdir. Hətta ermənilərə Qubadlı və Zəngilanda bizim yolun 21 kilometrindən istifadə etməyə icazə vermişik və onu blokadaya almırıq. Bu, sadəcə, bizim tərəfimizdən jest deyil, prinsipial siyasətdir.

Bu mənada biz Ermənistanın vətəndaş cəmiyyətindən daha çox şey gözləyirik, çünki nə Ermənistan iqtidarı, nə də müxalifəti Azərbaycana qarşı müsbət münasibət göstərmirlər.

Ermənistanda Azərbaycanofobiya davam edir, onilliklər ərzində azərbaycanlılara qarşı nifrət formalaşdırılır. Onlar erməni xalqına həqiqəti danışmağa başlamalıdırlar,  çünki müharibə tarixdə qaldı və gələcəyə baxmaq lazımdır", - İlham Əliyev qeyd edib.

“Hesab edirəm ki, biz burada və Yerevanda körpüləri fəal şəkildə qurmalıyıq. Əlbəttə, əgər bunu erməni tərəf istəyirsə. Biz hələ də sülh sazişinin mümkünlüyü barədə Ermənistandan mesaj almamışıq. Bununla yanaşı, Ermənistanın baş naziri sakitdir, xarici işlər naziri isə aqressivdir. Hətta indi də Ermənistan Azərbaycana qarşı aqressiv münasibətdən imtina edə bilmir. Onlar müharibədə nə baş verdiyini xatırlamalıdırlar.

Əgər Ermənistanın müsbət siqnalı varsa və o, əlaqələr qurmaq istəyirsə, biz əlimizdən gələni etməyə hazırıq", - prezident deyib.

O həmçinin bildirib ki, Bakının Ermənistanla sərhəddə heç bir hərbi planı yoxdur.

"Siz soruşdunuz ki, Rusiya sülhməramlı kontingenti regionu tərk etdikdən sonra nələr baş verəcək? Tovuzda, Qazaxda Ermənistanla sərhəddimiz var. Bizim  sərhəd qoşunlarımız Zəngilanda erməni tərəfinin bilavasitə yaxınlığında durur. İnsident baş verir? Xeyr. Erməni ordusu yoxdur, o, ruhdan düşüb, bizim qoşunlarımız onların bilavasitə yaxınlığında dayanır, ancaq bizim heç bir hərbi planımız yoxdur", -İlham Əliyev deyib.

Bununla yanaşı, Rusiya ilə birlikdə erməni ordusunun modernləşdirilməsi planları da suallar doğurur. "Biz mövqeyimizi rusiyalı tərəfdaşlara çatdırdıq. Bu nə üçün edilir? Revanş barədə istənilən düşüncənin qarşısı sərt şəkildə alınacaq", - Azərbaycan prezidenti əlavə edib.- 06B-