Prezident İlham Əliyev: �Dağlıq Qarabağ Azərbaycanın suverenliyindən kənarda heç bir status almayacaq�

Bakı/21.09.18/Turan: Milli Məclisin deputatları milli maraqlar məsələsində eyni mövqedən çıxış edirlər, vətənpərvərlik göstərərək dövlətin maraqlarını beynəlxalq səviyyədə müdafiə edirlər. Bu barədə prezident İlham Əliyev bu gün Azərbaycan parlamentinin 100 illiyinə həsr olunmuş təntənəli iclasdakı çıxışında bildirib.

O, Azərbaycanın bugünkü inkişafında parlamentin rolunu qeyd edib.

Parlamentin Azərbaycan reallıqlarını dünyaya çatdırdığını deyən prezident qeyd edib ki, onun fəaliyyətinin əsas istiqaməti Dağlıq Qarabağ münaqişəsi ilə bağlı həqiqətlərin çatdırılmasıdır və bu işdə son illərdə bir sıra uğurlar əldə edilib.

O qeyd edib ki, Ermənistan münaqişənin həlli ilə bağlı beynəlxalq təşkilatlar tərəfindən qəbul olunan qətnamələrə məhəl qoymur, işğalçılıq siyasətini davam etdirir.

"Münaqişənin yeganə həlli yolu Azərbaycanın ərazi bütövlüyünün təmin olunmasından keçir. "Bununla bağlı Ermənistanın yeni rəhbərliyi öz siyasətində ciddi dəyişikliklər etməlidir", - dövlət başçısı vurğulayıb.

O deyib ki, Azərbaycan öz prinsipial mövqeyindən geri dönməyəcək.

"Dağlıq Qarabağ əzəli və tarixi Azərbaycan torpağıdır və o, Azərbaycanın suverenliyindən kənarda heç bir status almayacaq", - İ.Əliyev bəyan edib.--0--