Prezident İlham Əliyev: "Ermənistan tərəfinin mövqeyində müsbətə doğru hərəkət var"

Bakı/12.07.23/Turan:  Bakı və Yerevan arasında sülh danışıqları ilə bağlı "Ermənistan tərəfinin mövqeyində müsbətə doğru hərəkət var", lakin “eyni sözlər kağız üzərində də öz təsdiqini tapmalıdır”. Bu barədə Azərbaycan prezidenti İlham Əliyev iyulun 11-də hökumətin 2023-cü ilin birinci yarısının sosial-iqtisadi yekunlarına həsr olunmuş iclasında bildirib.

“Bizim sülh danışıqları ilə bağlı mövqeyimiz aydındır, məntiqlidir, beynəlxalq hüquqa əsaslanır. Hesab edirəm ki, bu prinsiplə, beynəlxalq hüququn norma və prinsipləri əsasında sülh müqaviləsi imzalana bilər. Hər halda mən hesab edirəm ki, belə imkanlar var. Son danışıqlar raundları və bir neçə gündən sonra nəzərdə tutulan yüksək səviyyəli təmaslar bir məqsədi güdür ki, biz sülh anlaşmasına daha da yaxınlaşaq”, - o deyib. Ancaq o qeyd edib ki, hər şey Azərbaycandan asılı deyil. Ermənistan buna hazır olmalıdır və sözdə ifadə etdiyi prinsipləri kağız üzərinə də keçirməlidir.

“Son müsbət məqamlardan biri odur ki, Ermənistan tərəfinin mövqeyində müsbətə doğru hərəkət var. Əgər keçən ilin oktyabrında Azərbaycanın ərazi bütövlüyünü, suverenliyini və sərhədlərini qəbul etmişdisə, bu ilin may ayında daha irəli gedərək artıq Azərbaycan ərazisinin parametrlərini də, o cümlədən Qarabağ və anklav kəndlərimiz daxil olmaq şərtilə rəsmən tanıyıb. Bu, müsbət hal kimi qiymətləndirilməlidir. İndi sıra gəlib çatıb ki, eyni sözlər kağız üzərində də öz təsdiqini tapsın, imzalar atılsın və münasibətlər yaradılsın. Hər halda biz bu istiqamətdə öz səylərimizi davam etdirəcəyik”, - dövlət başçısı deyib. 06В