Prezident İlham Əliyev: �Ermənistana qarşı sanksiyalar tətbiq olunmalıdır�

Bakı/20.09.17/Turan: Azərbaycan ərzilərinin işğalını davam etdirən Ermənistana qarşı beynəlxalq sanksiyalar tətbiq edilməlidir. BMT Təhlükəsizlik Şurasının qətnamələrinin icra mexanizmi yaradılmalıdır. Bu barədə sentyabrın 20-də prezident İlham Əliyev BMT Baş Assambleyasının 72-ci sessiyasının açılışında bildirib.

İ.Əliyev qeyd edib ki, 25 ildən çoxdur ki, Ermənistan Azərbaycanın 20 faiz ərazisini - Dağlıq Qarabağı və ölkənin digər 7 rayonunu işğal altında saxlayır.

İ.Əliyev Xocalı soyqırımını xatırladıb. Soyqırım zamanı 613 dinc sakin qətlə yetirilib. Onların arasında 106 qadın və 63 uşaq var. Və insanlığa qarşı dəhşətli cinayətləri törətmiş hərbi cinayətkarlardan biri Ermənistanın indiki prezidentidir.

İ.Əliyev qeyd edib ki, Ermənistan 24 ildir ki, BMT TŞ-nin qətnamələrinə məhəl qoymur. Bəzi hallarda BMT TŞ-nin qətnamələri bir neçə gün ərzində icra olunur

"Bizə gəldikdə isə 24 ildir ki, qətnamələr icra olunmur. Bu, ikili standarta əsaslanan yanaşmadır. Bu yanaşma qəbuledilməzdir. Ermənistana qarşı beynəlxalq sanksiyalar qəbul edilməlidir. BMT-nin mühüm islahatlarından biri Təhlükəsizlik Şurasının qətnamələrinin icra mexanizminin yaradılması olmalıdır", - o bildirib.

Ermənistan status-kvonun dəyişməz qalması üçün əlindən gələni edir, substantiv danışıqların qarşısını alır. ATƏT-in Minsk Qrupunun həmsədrləri - Fransa, Rusiya və ABŞ dəfələrlə bildiriblər ki, status-kvo qəbuledilməzdir.

"Sual verilir: necə olur ki, despotik və orta əsrlər rejiminin idarə etdiyi bu cür korrupsiyaya uğramış, uğursuz dövlət uzun illər ərzində beynəlxalq hüququ pozmağa, BMT-nin Təhlükəsizlik Şurasının qətnamələrinə və dünyanın aparıcı ölkələrinin bəyanatlarına məhəl qoymamağa müvəffəq olur? Buna cavab isə ikili standartlardır. Təcavüzkara heç bir beynəlxalq təzyiq göstərilmir, Ermənistan diktatorluğuna heç bir beynəlxalq sanksiya tətbiq edilmir. Bu siyasətə son qoyulmalıdır", - dövlət başçısı bildirib.

O əlavə edib ki, Azərbaycan münaqişənin sülh yolu ilə həllinə sadiqdir, lakin Ermənistanın hərbi təxribatı davam edərsə ölkəmiz BMT-nin xartiyasına uyğun olaraq, öz vətəndaşlarını qoruyacaq və lazım gələrsə təcavüzkarı 2016-cı ilin aprelində olduğu kimi yenidən cəzalandıracaq.

"Ermənistan-Azərbaycan, Dağlıq Qarabağ münaqişəsi beynəlxalq hüquq, BMT-nin Təhlükəsizlik Şurasının qətnamələri əsasında həll olunmalıdır. Azərbaycanın ərazi bütövlüyü tam şəkildə bərpa olunmalıdır", - İ.Əliyev vurğulayıb.-06d--