Prezident İlham Əliyev hərbi əməliyyatların dayandırılmasının şərtlərini açıqlayıb

Bakı/03.10.20/Turan: Azərbaycan prezidenti İlham Əliyev “əl-Cəzirə” telekanalına müsahibəsində atəşkəsin şərtlərini açıqlayıb.

“Atəşkəsin yeganə şərti silahlı qüvvələrin Azərbaycanın işğal olunmuş ərazilərindən çıxarılmasıdır. Qoy, onlar çıxmağa başlasınlar, çıxmaqla bağlı bizdə cədvəl olsun, onlar üzərlərinə vasitəçilər tərəfindən təsdiq olunmuş ciddi öhdəliklər götürsünlər, atəşkəs rejiminə əməl etsinlər və əlbəttə ki, biz də eyni şeyi edəcəyik”, - İ.Əliyev bildirib.

O, Qarabağ münaqişəsinin həll olunmamasının ən əsas səbəbi kimi Ermənistanın münaqişə ilə bağlı destruktiv mövqeyini göstərib. Bundan əlavə, BMT Təhlükəsizlik Şurasının Azərbaycanın işğal olunmuş ərazilərindən erməni qüvvələrinin çıxarılmasını tələb edən dörd qətnaməsinin yerinə yetirilməsi üçün vasitəçilər tərəfindən Ermənistana təzyiq göstərilməməsi də münaqişənin həllinə mane olur.

“Mən həmişə demişəm ki, BMT Təhlükəsizlik Şurasının qətnamələrini yerinə yetirməsi üçün Ermənistana beynəlxalq sanksiyalar tətbiq edilməlidir. Lakin vasitəçilər mənim müraciətlərimə müvafiq cavab vermədilər”, - Azərbaycan prezidenti bildirib.

Ermənistanla danışıqların yenidən başlanmasına gəlincə, danışıqlarda tərəfdaşlar olmalıdır. “Hələlik Ermənistanın timsalında bizim danışıqlarda tərəfdaşımız yoxdur. Mən 2003-cü ildən danışıqlar prosesindəyəm. Mən indiyə qədər Ermənistanın iki keçmiş prezidenti ilə işləmişəm. Biz tərəqqi əldə etdik, hərçənd bu, asan deyildi. Bizim müxtəlif fikirlərimiz vardı, amma biz mərhələlərlə irəliləmişik və indiyə qədər nə vardısa, onu işləyib hazırlamışıq. Paşinyan hakimiyyətə gələndən sonra isə bütün əvvəlki razılaşmaları rədd edib. O hazırlanmlş  bütün prinsipləri məhv edib. Ona görə də bu gün bütün məsuliyyət onun və onun hökumətinin üzərinə düşür. Onun hər bir addımı danışıqlar prosesini məhv etmək məqsədi daşıyırdı. Ancaq indi  danışıqlar aparmağa yalvardığı, dünya liderlərinə dəfələrlə zəng vurduğu və Azərbaycandan şikayət etdiyi vaxtda dünya liderləri ona deməlidirlər ki, sən özün Azərbaycanı təhrik etdin və azərbaycanlıların hisslərini təhqir etdin. Sən buna görə məsuliyyət daşımalısan. Mən bir neçə gün bundan öncə onu məsuliyyətə cəlb etmək çağırışı ilə erməni xalqına müraciət etdim. Bizim erməni xalqı ilə problemimiz yoxdur. Onlar bizim vətəndaşlarımızdır. Hazırda Azərbaycanda minlərlə erməni yaşayır”, - İ. Əliyev bildirib.

Azərbaycan Dağlıq Qarabağ ermənilərini Azərbaycan vətəndaşları hesab edir. “Biz onları digər xalqların nümayəndələri kimi bizimlə birgə yaşamağa dəvət edirik”, - İ.Əliyev deyib.

Minsk Qrupunun həmsədr ölkələri birlikdə öz işlərini davam etdirməlidirlər. Əlbəttə ki, onlar neytrallığı saxlaya bilsələr.  “Hər bir ölkənin öz mövqeyi ola bilər. Amma əgər siz belə həssas məsələdə vasitəçisinizsə, onda siz neytrallıq mövqeyindən çıxış etməlisiniz. Son zamanlar vasitəçilərdən birinin (Makron – red.) neytrallığın dəyişməsini nümayiş etdirən bəyanatları bizi narahat edir” , - İ.Əliyev vurğulayıb. 

“Əgər siz vasitəçisiniz, neytral olmalısınız. Əks halda sizin vasitəçiliyiniz bizim tərəfimizdən qəbul edilməyəcək”, - o əlavə edib.

Ermənistan oktyabrın birindən öz ərazisindən uzaq radiuslu raketlərindən istifadə etməyə və yaşayış məntəqələrimizi atəşə tutmağa başlayıb. Beləliklə, onların işə salınma yerləri qanuni hədəflərə çevrildi ki, biz onları məhv edək. Sonra onlar bizi günahlandıracaqlar ki, biz Ermənistan ərazisinə hücum edirik. Onlar bunu istəyirlər. Onlar üçüncü ölkələri bu münaqişəyə cəlb etmək istəyirlər ki, bu ölkələr onları müdafiə etsinlər və onlar üçün daha 30 il işğalı təmin etsinlər”, - prezident vurğulayıb.

“Atəşkəsin yeganə şərti silahlı qüvvələrin Azərbaycanın işğal olunmuş ərazilərindən çıxarılmasıdır. Qoy onlar çıxmağa başlasınlar, çıxmaqla bağlı bizdə cədvəl olsun, onlar üzərlərinə vasitəçilər tərəfindən təsdiq olunmuş ciddi öhdəliklər götürsünlər, atəşkəs rejiminə əməl etsinlər və əlbəttə ki, biz də eyni şeyi edəcəyik. Bu hərbi toqquşma bizim nəyimizə lazımdır? Bizə torpaqlarımızın sülh yolu ilə geri qayıtması lazımdır. Biz sülh yolu ilə həllə istəkli olduğumuzu 28 il ərzində nümayiş etdirdik. Biz bütün ərazilərimizi geri qaytaracağıq və bu, bizim qanuni haqqımızdır. Bu, bizim tarixi vəzifəmizdir və mən əminəm ki, biz buna nail olacağıq”, - İ. Əliyev bildirib.–71D-