Prezident İlham Əliyev: “Laçında sərhəd məntəqəsinin yaradılması Azərbaycanın suveren hüququdur” /YENİLƏNİB/

Bakı/27.04.23/Turan: Cümə axşamı prezident İlham Əliyev Fransanın xarici işlər naziri Katrin Kolonna ilə söhbət zamanı qeyd edib ki,  ikitərəfli münasibətlərin perspektivləri barədə fikir mübadiləsi aparmaq və gələcək dövr üçün əməkdaşlığın yol xəritəsini müəyyənləşdirmək baxımından Fransa Xarici İşlər Nazirliyinin rəhbərinin  Bakıya səfəri əhəmiyyətlidir.

İkitərəfli münasibətlərin gündəliyi həmişə siyasi, iqtisadi, enerji, nəqliyyat və digər sahələrdə geniş olub.

Ermənistan-Azərbaycan münasibətlərinə toxunan Əliyev deyib ki, 44 günlük müharibə başa çatdıqdan sonra Ermənistana bir-birinin ərazi bütövlüyünü qarşılıqlı olaraq tanımaq və sülh müqaviləsini imzalamaq təklif olunub. Lakin Ermənistan buna getmir və 10 noyabr 2020-ci il tarixli üçtərəfli bəyanatla bağlı öhdəliklərini yerinə yetirmir.

Əsasən Ermənistan Naxçıvana dəhliz açmaq istəmir, öz qoşunlarını Qarabağdan çıxarmır və Laçın dəhlizindən Qarabağa silah və digər hərbi təyinatlı yüklərin daşınması üçün istifadə etməyə çalışır.

Azərbaycan-Ermənistan sərhədində sərhəd-buraxılış məntəqəsinin yaradılması Azərbaycanın suveren hüququdur və Azərbaycanın ərazi bütövlüyünün təmin edilməsidir.

Cavab sözündə Kolonna "Azərbaycan prezidentilə açıq və müntəzəm təmaslara mühüm əhəmiyyət verən" prezident Makronun salamını çatdırıb.

Onun sözlərinə görə, Fransa Azərbaycanda və bütün Cənubi Qafqaz regionunda sülhün, iqtisadi və sosial inkişafın tərəfdarıdır. Fransa Azərbaycanla ikitərəfli əlaqələrə və Avropa İttifaqı çərçivəsində əməkdaşlığa mühüm önəm verir. 16B

*   *   *

2023 Aprel 27 (Cümə axşamı) 13:13:22

Fransa Xarici İşlər Nazirliyinin rəhbəri Bakıda görüşlər keçirir

Bakı/27.04.23/Turan: Cümə axşamı səhər Fransanın Xarici İşlər Nazirliyinin rəhbəri Katrin Kolonna prezident İlham Əliyevlə görüşüb. Görüşdə Ermənistan-Azərbaycan münaqişəsinin nizamlanması məsələləri müzakirə edilib. Dövlət başçısının mətbuat xidməti hələlik görüşdən təfərrüatları açıqlamayıb.

Günortaya yaxın Kolonnanın Azərbaycanın xarici işlər naziri Ceyhun Bayramovla görüşü başlayıb.

Görüşdən sonra onların mətbuat konfransı keçiriləcək.

Xatırladaq ki, fransalı nazir Cənubi Qafqaz ölkələrinə turneyə çıxıb, Bakıdan sonra Yerevan və Tbilisiyə gedəcək. 02B