Prezident İlham Əliyev müxalifətə qarşı barışmaz olmağa çağırıb (YENİLƏNİB)

2013 İyun 08 (Şəmbə) 13:59:22

Ötən gün Yeni Azərbaycan Partiyasının (YAP) V qurultayında prezidenti İlham Əliyev müxalifəti “antimilli” fəaliyyətdə ittiham edib. 

“Bunlar vaxtilə iqtidarda olmuş və bu gün də iqtidar arzusu ilə heç bir əsası olmadan yaşayan antimilli xəyanətkar, satqın qruplaşmalardır.  Onların siyasi mübarizə üsulu söz, fikir yox, “Molotov kokteylidir”, -İ.Əliyev bildirib.

“Onların dayaqları xalq, xalqın iradəsi deyil, xaricdən verilən qrantlar, pullardır. Onların söz azadlığı donos yazmaqdır, Azərbaycanı ləkələməkdir, beynəlxalq təşkilatlara uydurmalar, iftiralar göndərmək, yaymaqdır. Onların davranış qaydaları ermənilərlə birləşib Azərbaycanı ləkələmək və Azərbaycan haqqında mənfi rəy formalaşdırmaqdır. Əlbəttə ki, Azərbaycanın siyasi həyatında belə qruplaşmalara yer yoxdur və ola da bilməz”, - dövlət başçısı vurğulayıb.

Seçki ərəfəsində İ.Əliyevin müxalifətin ünvanına söylədiyi fikirlərdən belə məlum olur ki, siyasi vəziyyət çox güman ki, konfrontasion ssenari üzrə, rejim tənqidçilərinə qarşı repressiyaların mümkün güclənməsilə inkişaf edəcək.—16/06D--