Prezident İlham Əliyev Paşinyanla danışıqlarda məna görmür

Bakı/05.11.20/Turan: Azərbaycan prezidenti İlham Əliyev hesab edir ki, hazırkı vəziyyətdə Qarabağda münaqişəsinin nizamlanması məsələlərini müzakirə etmək üçün Ermənistanın baş naziri Nikol Paşinyanla danışıqlar masası arxasına əyləşməyin “mənası yoxdur”. İ.Əliyev ATƏT-in Minsk Qrupu həmsədrlərinin vasitəçiliyilə iki ölkə XİN rəhbərləri səviyyəsində görüşü danışıqlar üçün uyğun format adlandırıb.

İ.Əliyev İspaniyanın EFE agentliyinə müsahibəsində bildirib deyib ki, Paşinyanla dəfələrlə danışıqlar aparıb, amma demək olar ki, bütün görüşlər “faydasız” olub.

 “Bunun heç bir mənası yoxdur. Son iki ildə mənim onunla çoxsaylı görüşlərim olub, lakin onların hamısı tamamilə səmərəsiz və mənasız olub, ilk görüşlər istisna olmaqla. O, mənə söz vermişdi ki, əgər Azərbaycan ona vaxt versə, o, yaxşı hazırlaşacaq, Ermənistanda siyasi cəhətdən öz mövqeyini gücləndirəcək və sonra əsas prinsipləri yerinə yetirmək üçün konstruktiv şəkildə işləməyə hazır olacaq”, - İ.Əliyev deyib.

“Bu, onun Ermənistanda rəhbərliyinin ilk aylarında mənə söylədikləri idi. Lakin bir ildən sonra tamamilə fərqli sözlər dedi”, - prezident bildirib. “Sonra dedi ki, Azərbaycana qaytarılası bir qarış belə torpaq yoxdur. Dedi ki, “Qarabağ Ermənistandır”, Azərbaycan Dağlıq Qarabağdakı qondarma qurumun “rəhbərliyi” ilə danışıqlar aparmalıdır”, - İ.Əliyev deyib.   

“Ona görə də hazırda mən onunla görüşməkdə bir məna görmürəm. Bu yaxınlarda bizim xarici işlər nazirlərimiz Cenevrədə görüşüblər və mən düşünürəm ki, hazırda bu, Bakı və Yerevan arasında təmas üçün doğru formatdır”, - prezident bildirib. 

İ.Əliyev bir daha bildirib ki, müharibə istəmir və dərhal onu dayandırmağa hazırdır, əgər Paşinyan Ağdam, Kəlbəcər və Laçın rayonlarından qoşunların çıxarılması qrafikini təqdim edərsə.

“Biz hərbi əməliyyatları davam etdirmək istəmirik və mən dəfələrlə demişəm və bu gün də təkrar edə bilərəm, əgər Ermənistanın baş naziri şəxsən özü, bu qan tökülməsinə görə məsuliyyət daşıyan şəxs belə bir bəyanat versə, biz dərhal dayanmağa hazırıq”, - prezident vurğulayıb. –06D--