Budcə müzakirələri gecikir

Bakı/05.11.20/Turan: Azərbaycanda 2020-ci il ilə müqayisədə 2021-ci ilin budcə xərcləri 1,6 milyard manat azala bilər. 2021-ci ildə Azərbaycanın dövlət büdcəsinin gəlirləri 24 327,0 mln. manat proqnozlaşdırılır.

Bu rəqəm Maliyyə Nazirliyinin 2021-ci ilin dövlət və icmal büdcələrinin ilkin göstəricilərinə dair açıqlamada yer alır.

Orada bildirilir ki, gəlirlərin 57,3 faizi neft sektorunun, 42,7 faizi qeyri-neft sektorunun payına düşür.

Üstəlik, 2021-ci il üçün icmal və dövlət büdcəsinin gəlirləri hesablanarkən neftin bir barelinin qiyməti 35 ABŞ dollarına bərabər götürülüb. 2021-ci ildə dövlət büdcəsinin xərcləri isə 25 847,5 mln. manat proqnozlaşdırılır.

Baxmayaraq ki, 2021-ci ilin dövlət büdcəsinin layihəsi iki aydan çoxdur Maliyyə Nazirliyində hazırlanıb,  Nazirlər Kabinetində təsdiqlənib, amma müzakirəsi gecikir.

Buna səbəb nədir?Müzakirələr yaxın vaxtlarda gözlənilirmi? Layihədə hansısa ciddi dəyişiklik ola bilərmi? Deputatlar, ekspertlər bu barədə nə düşünür?

Milli Məclisin İqtisadi siyasət, sənaye, sahibkarlıq komitəsinin üzvü,  deputat Vahid Əhmədov “Turan”a bildirib ki, hazırda ölkədə Vətən mühribəsi gedir, cəbhədə çox ciddi irəliləyşilər var: “2021-ci il üçün nəzərdə tutulan büdcə layihəsilə bağlı müzakirələrin yubanması bununla da bağlı ola bilər. Müəyyən xərclər var ki, onlar dəyişdirilir, müəyyən işlər görülür. Ona görə də burada elə bir ciddi problem yoxdur”, deyə deputat müzakirələrin yubanma səbəbini bildirir.

Deputat deyir ki, hazırkı şəraitdə büdcə layihəsilə bağlı müzakirələrin tərəfdarı deyil: “Xalq, millət, dövlət, vətən üçün ən mühüm əhəmiyyətli və 1 saylı məsələ torpaqların azad edilməsidir”, deyə o bildirir.

V.Əhmədov vurğulayır ki, ərazi bütövlüyünün bərpa edilməsindən sonra qalan bütün məsələlər öz yerini və həllini tapacaq.

Iqtisadçi-ekspert Natiq Cəfərli də bildirib ki, 2021-ci il üçün büdcə layihəsinin müzakirələrinin gecikmsinə əsas səbəb Azərbaycanaın apardığı əks-hücum və torpaqların işğaldan azad olunması əməliyyatlarıdır.

O, hesab edir ki, bu əməliyyat nəticələrinə görə, gələn ilin büdcəsində müəyyən xərc və gəlir istiqamətlərinin müəyynləşdirilməsində önəmli rol oynaya bilər: “İşğaldan azad olan ərazilərin təhlükəsizliyinə, bərpa işlərinin aparılmasına, təkcə İranla yox, həm də Ermənistanla sərhədlərin möhkəmləndirilməsinə kifayət qədər böyük vəsait lazımdır. Bu əkas-hücum əməliyyatlarının uğurla başa şatması büdcə parametrlərində kifayət qədər ciddi dəyişkliklərə səbəb ola bilməsi ehtimalı yüksəkdir. Çünki, gələn ilin büdcəsində müdafiə, sərhədlərin qorunması və digər istiqamətlərlə bağlı yeni xərclərin ortaya çıxması ehtimalı da kifayət qədər yüksəkdir”.

N.Cəfərli hesab edir ki, bu il noyabrın sonuna, dekabrın əvvəlinə büdcə layihsinin parametrləri parlamentə, həm də ictimai müzakirələrə açıq ola bilər. Ekspert istisna etmir ki, büdcə layihəsi dekabrda qəbul edilsə belə gələn il ona yenidən baxılması ehtimalını yüksək olaraq qalır.

Gələn il büdcəsi paramertlərinin tam açıqlanmadığını deyən iqtisadçı layihənin həm gəlir, həm də xərc hissəsində dəyişikliklər ehtimalını yüksək sayır.

Ekspert vurğulayır ki, həm neftin qiymətinin düşməsi, həm pandemiya ilə bağlı iqtisadi aktivliyin zəifləməsi, sərhədlərin bağlı qalması gəlirlərə də təsir edir.  

Onun fikrincə, bu səbəblərə görə büdcənin gəlir və xərc parametrlərində  ciddi dəyişkliklərin olması ehtimalı da yüksəkdir.   –0—