Prezident İlham Əliyev: “Qarabağ ərazisində bizim etibarlı mənbələrimiz olub”

Bakı/20.11.20/Turan: İkinci Qarabağ müharibəsi başlamadan öncə Qarabağın özündə və işğal olunmuş ərazilərdə 65 mindən çox insan yaşayıb. Ona görə də ermənilərin Qarabağdan olan 90 min qaçqın haqqında dedikləri yalandır. Bu barədə dövlət başçısı İlham Əliyev noyabrın 20-də xalqa müraciətində bildirib.

“Biz bunu haradan öyrənmişik? Bizdə operativ məlumat var. Bizim o bölgədə bir çox informasiya mənbələrimiz var və bizim uğurlarımızın səbəblərindən biri də məhz bundadır. Biz tam dəqiqliklə bilirdik və bilirik indi orada nə baş verir, onların xunta başçısı harada gizlənir. Yəqin o da bilir ki, biz bilirdik. Ona görə burnunu çıxara bilmirdi küçəyə, bunkerdə otururdu”, - İ.Əliyev qeyd edib.

Gələcək vəziyyətə toxunan İ.Əliyev erməni tərəfinə xəbərdarlıq edib ki, erməni faşizmi bir də baş qaldırsa, əgər bizə qarşı hər hansı bir təxribat törədilərsə, 10 qatını alacaqlar.

“Sadəcə olaraq, xəritəyə baxmaq kifayətdir, hər kəs görsün ki, kimin əlində hansı imkanlar var”, - o vurğulayıb.-02B-