Prezident İlham Əliyev Rusiya baş nazirinin müavini Aleksey Overçuku qəbul edib

Bakı/01.04.21/Turan: Aprelin 1-də dövlət başçısı Rusiya baş nazirinin müavini Aleksey Overçuku qəbul edib. O, Rusiya, Azərbaycan və Ermənistan arasında barışıq imzalandıqdan sonra regional əməkdaşlığın və kommunikasiyaların bərpası üzrə razılaşmaların həyata keçirilməsi məsələlərilə məşğul olur.

Prezidentin mətbuat xidmətinin məlumatına görə, qonağı salamlayan prezident İlham Əliyev deyib ki, üçtərəfli hökumətlərarası komissiya çərçivəsində işlər uğurla gedir, "çox intensiv məsləhətləşmələr aparılır".

“Şadam ki, qəbul edilmiş qərarın düzgün olması təsdiqlənir, ən başlıcası, artıq konkret nəticə var”, - Əliyev deyib.

Sonra Əliyev deyib ki, tərəflər beş görüş keçiriblər və “müzakirə üçün mövzu var, bu mövzu həm iqtisadi preferensiyalar, həm regional əməkdaşlıq, həm də bizim regionda təhlükəsizliyin və sülhün möhkəmlənməsi baxımından vacibdir. Münaqişədən sonrakı dövrdə vəziyyət bütövlükdə müsbət istiqamətdə inkişaf edir, eskalasiya riskləri minimaldır”.

Öz növbəsində Overçuk deyib ki, üçtərəfli komissiya həm əyani, həm də videokonfrans formatında beş görüş keçirib. “Həqiqətən işdə müəyyən tərəqqi var və iş sıx əlaqəli şəkildə davam edir. Tərəflər arasında çox yaxşı əlaqələr qurulub”, - Overçuk deyib.-02D-