Prezident İlham Əliyev Sərdar Berdımuhəmmədovu Türkmənistan prezidenti seçilməsi münasibətilə təbrik edib

Bakı/15.03.22/Turan: Martın 15-də Azərbaycan prezidenti İlham Əliyev Sərdar Berdımuhəmmədova Türkmənistan prezidenti seçilməsi münasibətilə təbrik məktubu göndərib.

“Azərbaycan tarixi, dini və mədəni köklərlə bağlı olduğu qardaş Türkmənistanla ənənəvi dostluq əlaqələrinin hərtərəfli inkişafına xüsusi əhəmiyyət verir.

İkitərəfli münasibətlərdə mövcud olan yüksək səviyyəli siyasi dialoq, iqtisadi, enerji, nəqliyyat, humanitar və digər sahələrdə qarşılıqlı faydalı əməkdaşlıq məmnunluq doğurur.

Əminəm ki, Azərbaycan-Türkmənistan strateji tərəfdaşlığı bundan sonra da birgə səylərimizlə inkişaf edərək ölkələrimizin rifahına xidmət edəcək”,- məktubda deyilir.

Sonda Əliyev Türkmənistanın yeni rəhbərini Azərbaycana səfərə dəvət edib.

*41 yaşlı Sərdar Berdımuhəmmədov Türkmənistanın əvvəlki prezidenti Qurbanqulu Berdımuhəmmədovun 41 yaşlı oğludur. Bundan öncə baş nazirin müavini olub, ondan öncə isə sənaye naziri, ölkə vilayətlərindən birinin rəhbəri, xarici işlər nazirinin müavini və Türkmənistanın Birləşmiş Millətlər Təşkilatı Cenevrə nümayəndəliyinin əməkdaşı olub. Bəzi məlumatlara görə, Rusiya Diplomatik Akademiyasını (2011-2013-cü illər) bitirib. -02D-