Prezident İlham Əliyev və Binəli Yıldırım işğaldan azad edilmiş ərazilərdə Türkiyə şirkətlərinin fəaliyyətini müzakirə ediblər

Bakı/14.06.23/Turan: Bu gün Azərbaycan prezidenti İlham Əliyev Türkiyənin Ədalət və İnkişaf Partiyası sədrinin birinci müavini Binəli Yıldırımı qəbul edib, dövlət başçısının saytı bildirib.

Görüş zamanı Əliyev Rəcəb Tayyib Ərdoğanın yenidən Türkiyənin prezidenti seçilməsindən sonra iyunun 12-13-də Azərbaycanda səfərdə olmasını xatırladıb. O  qeyd edib ki, dövlət başçıları Azərbaycan-Türkiyə müttəfiqliyinin  müxtəlif sahələrdə inkişafı ilə bağlı müvafiq nazirliklərə tapşırıqlar veriblər.

Söhbət zamanı Türk Dövlətləri Təşkilatı çərçivəsində əməkdaşlığın daha da genişləndirilməsinin vacibliyinə toxunulub, Binəli Yıldırımın təşkilat çərçivəsində Ağsaqqallar Şurasının sədri kimi fəaliyyəti vurğulanıb.

Görüşdə Azərbaycanın işğaldan azad edilmiş ərazilərində Türkiyə şirkətlərinin fəaliyyəti qeyd edilib.

Öz növbəsində Binəli Yıldırım deyib ki, Azərbaycanda olduğu müddətdə nümayəndə heyətilə birlikdə Şuşaya gedəcək və orada aparılan genişmiqyaslı tikinti-quruculuq işlərilə tanış olacaq. O, Ağsaqqallar Şurasının sədri kimi Türk Dövlətləri Təşkilatı çərçivəsində əməkdaşlığın daha da genişlənməsinə öz töhfəsini verəcəyini vurğulayıb.

Görüş zamanı iki ölkənin hakim Yeni Azərbaycan Partiyası ilə Ədalət və İnkişaf Partiyası arasında əməkdaşlıq məsələlərinə toxunlub.06В