Daha 22 ailə Laçına qayıdır

Bakı/14.06.22/Turan: Bu gün daha 22 ailə, o cümlədən 72 nəfər öz doğma yurduna qayıtmaq üçün Bakının Qaradağ rayonundakı "Qobu Park 3" yaşayış kompleksindən Laçına yola düşüb.

Ailələr əsasən Bakı və Sumqayıt şəhərlərində, eləcə də Abşeron rayonunda müvəqqəti yaşayış yerlərində yaşayan məcburi köçkünlər arasından seçilib. Onlar bərpa edilmiş və ya yenidən tikilmiş evlərdə məskunlaşacaqlar.

Ailələrin Laçına yola salınması mərasimində Qaçqınların və Məcburi Köçkünlərin İşləri üzrə Dövlət Komitəsinin, prezidentin Laçın rayonundakı xüsusi nümayəndəliyinin və Laçın Rayon İcra Hakimiyyətinin nümayəndələri iştirak ediblər.

Bu ilin sonunadək 2 minədək məcburi köçkün ailəsinin, yəni 10 minə yaxın adamın Qarabağ və Şərqi Zəngəzur iqtisadi rayonlarında öz doğma evlərinə qayıdışı planlaşdırılır, Qaçqınların və Məcburi Köçkünlərin İşləri üzrə Dövlət Komitəsi sədrinin müavini Fuad Hüseynov bildirib.

Onun sözlərinə görə, Laçına 700, Zabux və Sus kəndlərinə isə 400 ailənin köçürülməsi planlaşdırılıb.

Bu yaşayış məntəqələri 44 günlük İkinci Qarabağ Müharibəsinin yekunlarına əsasən Azərbaycan, Ermənistan və Rusiya liderlərinin imzaladığı 10 noyabr 2020-ci il tarixli üçtərəfli bəyanatın şərtlərinə uyğun olaraq ötən ilin avqustunda erməni işğalından azad edilib.

Bundan öncə mayın 27-də Laçına ilk 20 ailə, o cümlədən 97 nəfər qayıdıb. 06B