Prezident İlham Əliyev: “Xristian məbədlərinin taleyilə bağlı narahat olmaq lazım deyil”

Bakı/24.11.20/Turan: Azərbaycan prezidenti İlham Əliyev Bakının nəzarətinə keçən Qarabağ ərazilərində xristian məbədlərinin taleyilə bağlı narahat olmamağa çağırıb. O qeyd edib ki, onların hamısı ölkənin tarixi sərvətləridir. Bu barədə noyabrın 23-də o, erməni işğalından azad edilmiş Ağdam məscidinin qarşısında bildirib.

“Bu gün, müharibə başa çatandan sonra artıq Qərb dairələrindən bəzi Qərb liderləri məsələ qaldırırlar ki, bəs, Azərbaycanın nəzarətinə keçən azad edilmiş torpaqlarda xristian məbədləri necə olacaq? Həm mənimlə söhbət zamanı, həm rəsmi bəyanatlarda narahatlıq ifadə edirlər. Heç kim narahat olmasın, xüsusilə Qərb dövlətlərinin liderləri, hansılar ki, islamofob hissləri alovlandırırlar. Hansılar ki, İslam müqəddəslərinin təhqirlərinə göz yumurlar və hətta onları təhqir edənlərə bəraət qazandırırlar. Onların haqqı yoxdur bu barədə danışmağa, bu, birincisi. İkincisi, bizim ərazimizdə olan bütün məbədlər tarixi sərvətimizdir”, - prezident deyib.

O qeyd edib ki, ölkəmizdə bütün tarixi abidələr dövlət tərəfindən qorunur. Xristian məbədlərinin bir qismi erməniyə aid deyil. Bunlar alban və pravoslav məbədləridir, - o bildirib. -02D-