Prezident Nauseda: “Litva Azərbaycan və Avropa İttifaqı arasında daha sıx dialoqa tərəfdardır”

Bakı/18.05.22/Turan: Bu gün Bakıda Azərbaycan və Litva liderləri İlham Əliyevlə və Gitanas Nauseda görüşündə iki ölkə arasında əlaqələrin daha da genişləndirilməsi məsələləri müzakirə olunub.

Qonağı salamlayan Əliyev Nausedanın səfərinin ikitərəfli münasibətlərin inkişafına mühüm töhfə verəcəyinə əminliyini ifadə edib. “Biz əməkdaşlığımızın səviyyəsindən razıyıq. Səfəriniz zamanı bir sıra tədbirlər, o cümlədən biznes- forum keçiriləcək. Bizim işgüzar dairələrimiz arasında əməli fəaliyyətə böyük qarşılıqlı maraq var”, - Azərbaycan prezidenti bildirib.

O həmçinin qeyd edib ki, hazırkı danışıqların gündəliyində siyasi münasibətlərin inkişafı, siyasi dialoq və regional vəziyyət var.

Öz növbəsində Nauseda qeyd edib ki, onun səfəri “ikitərəfli münasibətlərin inkişafına əlavə təkan vermək” üçün yaxşı imkandır.

“Ümid edirəm ki, biz bu potensialı üzə çıxaracağıq və istifadə edəcəyik. Bizneslə yanaşı, buraya ictimai həyatın müxtəlif sahələri daxildir. Şübhəsiz ki, regional təhlükəsizlik və Avropa İttifaqı ilə münasibətlər ən vacib məsələlərdən biridir.

Litva hər zaman Qafqaz və Avropa İttifaqı ölkələri arasında daha sıx dialoqun tərəfdarıdır. Biz "Şərq tərəfdaşlığı" layihəsini də qətiyyətlə dəstəkləyirik və bu məsələni sizinlə müzakirə etmək istərdik", -  Litva prezidenti deyib.

Səfər çərçivəsində Litva prezidentini iki universitetin rektorları və digər ali məktəblərin nümayəndələri müşayiət edirlər. Təhsil sahəsində əməkdaşlığın daha yüksək səviyyəyə qaldırılması üzrə birgə proqramların müzakirəsi nəzərdə tutulur.- 06B-