Prokuror Dubakovun 11 il azadlıqdan məhrum olunmasını istəyib

Bakı/13.07.21/Turan: Bu gün Bakı Ağır Cinayətlər Məhkəməsində terrorizmdə ittiham olunan Rusiya vətəndaşı Eduard Dubakovun cinayət işi üzrə prosesdə dövlət ittihamçısı yekun sözü ilə çıxış edib.

Prokuror Dubakovun 11 il müddətinə azadlıqdan məhrum olunmasını və sonradan onun ölkə hüdudlarından kənara çıxarılmasını təklif edib.

Öz növbəsində Dubakovun vəkili deyib ki, onun müdafiə etdiyi şəxs ermənilərin işğal etdikləri ərazilərdə hərbi təlimlərdə iştirak etsə də, o, Azərbaycan ordusuna qarşı hərbi əməliyyatlarda iştirak etməyib.

Vəkil bunun yumşaldıcı hal kimi nəzərə alınmasını xahiş edib.

Müttəhim son sözə hazırlaşmaq üçün vaxt istəyib.

Hakim növbəti iclası iyulun 22-nə təyin edib.

Dubakov Azərbaycan Cinayət Məcəlləsinin 214-3.1-ci (terrorizm, terrorizmin maliyyələşdirilməsi), 218.2-ci (cinayətkar birlikdə (cinayətkar təşkilatda) və ya mütəşəkkil qrupların təşkilatçılarının, rəhbərlərinin və ya digər nümayəndələrinin birləşməsində iştirak), 318.2-ci (Azərbaycan Respublikasının dövlət sərhəddini qanunsuz keçmə) maddələri ilə ittiham olunur. –16d06-