Putin Ərdoğana bildirib ki, Kiyevin tələbləri dəyişməyib

Bakı/06.03.22/Turan: Türkiyə Ukrayna probleminin ən qısa müddətdə dinc yolla həllinə mühüm töhfə verməyə hazırdır.

Bu barədə martın 6-da Türkiyə prezidenti Rəcəb Tayyib Ərdoğan Rusiya prezidenti Vladimir Putinlə telefon danışığı zamanı bildirib, “Anadolu” xəbər verir.

Ərdoğan atəşkəsə nail olunması, humanitar dəhlizlərin açılması və sülh sazişinin imzalanması üçün təxirəsalınmaz addımların atılmasının vacibliyini vurğulayıb.

"Gəlin, birlikdə sülhə yol açaq", - Türkiyə prezidenti deyib.

Türkiyə lideri təcili olaraq Ukraynada  ümumi atəşkəsin təmin edilməsinə çağırıb.

Dövlət başçısı deyib ki, atəşkəs nəinki regionda humanitar məsələləri həll edəcək, həm də siyasi həllin tapılmasına imkan verəcək.

Ərdoğan əlavə edib ki, Türkiyə Ukrayna tərəfi və digər ölkələrlə daim əlaqədədir, hərtərəfli danışıqların aparılması və nəticənin əldə olunması üçün səylərini davam etdirəcək.

Öz növbəsində, Kremlin mətbuat xidməti məlumat verib ki, Putin bildirib ki, Rusiyanın Ukraynada hərbi əməliyyatı dayandırması yalnız Kiyevin hərbi əməliyyatları dayandıracağı və Moskvanın tələblərini yerinə yetirəcəyi təqdirdə mümkündür. Kremldən bildiriblər ki, söhbət Ukraynanın neytral nüvəsiz statusundan, ölkənin mütləq demilitarizasiyası və denasifikasiyasından gedir. Bundan əlavə, Rusiya Krımın məxsusluğunun, Donetsk və Luqansk vilayətlərinin inzibati sərhədlərində Donetsk və Luqansk Xalq respublikalarının (DXR və LXR) suverenliyinin tanınmasını gözləyir.—0—