Putin və Erdoğan Rusiya-Türkiyə münasibətlərindən məmnunluqlarını ifadə ediblər

Bakı/05.08.22/Turan: Rusiya prezidenti Vladimir Putinin Soçidə Türkiyəli həmkarı Recep Tayyip Erdoğanla danışıqları, Türkiyə liderinin sözlərinə görə, “ikitərəfli münasibətlərdə yeni səhifə aça bilər”.

Putin Avropanın Rusiya qazı ilə təchizatının ən mühüm arteriyalarından birinə çevrilən “Türkiyə axını”nın artan rolunu vurğulayıb və Ukrayna taxılının dəniz yolu ilə ixracının təşkilində Erdoğanın xidmətlərini qeyd edib, xəbəri TASS yayıb.

Rusiya prezidenti Türkiyəli həmkarının Ukrayna taxılının Qara Dəniz limanlarından ixracı məsələsinin həllində iştirakını qeyd edib. Putin ixracın başlamasına görə “və eyni zamanda Rusiyanın ərzaq məhsullarının və gübrələrinin dünya bazarlarına fasiləsiz çatdırılması haqqında qərarlar paketi qəbul edildiyinə görə” Erdoğana təşəkkür edib.

Putin “Türkiyə axını”nı “Avropanın Rusiya qazı ilə təchizatının ən mühüm arteriyalarından biri” adlandırıb və qeyd edib ki, qaz kəməri “bizim karbohidrogenlərimizin bütün digər tədarük istiqamətlərindən fərqli olaraq, yaxşı işləyir, heç bir nasazlıq olmadan ritmik şəkildə işləyir”.

“Düşünürəm ki, Avropalı tərəfdaşlar bizim qazımızın Avropa bazarına fasiləsiz tranzitini təmin etdiyinə görə Türkiyəyə minnətdar olmalıdırlar”, deyə Putin qeyd edib.

Ankara üçün “Rosatom”un həyata keçirdiyi “Akkuyu” atom elektrik stansiyasının tikintisi məsələsi çox vacib məsələ olaraq qalır. Erdoğanın sözlərinə görə, “işlər qrafikə uyğun həyata keçirilməlidir”.

Hər iki prezident Suriyadakı vəziyyəti müzakirə etməyə hazır olduqlarını bildiriblər. “Türkiyə və Rusiya burada vəziyyətin normallaşmasına çox böyük töhfə verib”, deyə Putin qeyd edib.

Putinin sözlərinə görə, Rusiya və Türkiyənin həyata keçiriləcək çox sayda ikitərəfli layihələri var. O xatırladıb ki, “iki ölkə arasında ticarət dövriyyəsi 57% artıb, may da daxil olmaqla, bu ilin ilk aylarında isə bu göstərici iki dəfə artıb”.

Öz növbəsində, Erdoğan danışıqların “ikitərəfli münasibətlərdə yeni səhifə açacağına” ümid etdiyini bildirib. Onun sözlərinə görə, Soçidə iki ölkə lideri “necə irəliləyəcəkləri məsələsinə nöqtə qoymağı” planlaşdırırlar.

Görüşün yekunu olaraq RF və Türkiyə arasında ticari əlaqələrin inkişafı haqqında memorandum imzalanacağı gözlənilir, deyə TASS-ın məlumatında bildirilir.--0--