“Putinin dostu” “Şöhrət” ordenilə təltif edilib

Bakı/13.01.21/Turan: Bu gün prezident İlham Əliyev İlham  Rəhimovun Azərbaycanda hüquq sahəsində çoxillik səmərəli fəaliyyətinə görə "Şöhrət" ordeni ilə təltif edilməsi haqqında sərəncam imzalayıb.

Bu fəaliyyətin nədən ibarət olduğu aydın deyil, çünki Rəhimov heç vaxt ölkənin hər hansı hüquqi aktlarının və ya qanunlarının işlənib hazırlanmasında və ya qəbul olunmasında iştirak etməyib.

O, daha çox Vladimir Putinin kurs yoldaşı və Azərbaycanın hüdudlarından kənarda-Moskvada maraqları olan iri biznesmen kimi tanınır.

Leninqrad Dövlət Universitetinin hüquq fakültəsinin məzunu olan İ.Rəhimov 1978-ci ildə namizəd, 1988-ci ildə isə cinayət hüququ sahəsində elmlər doktoru olub.

Azərbaycan EA Fəlsəfə və Hüquq İnstitutunda kiçik elmi işçi kimi fəaliyyətə başlayıb, sonra Azərbaycan Ədliyyə Nazirliyində çalışıb.

1992-1996-cı illərdə Kriminologiya Elmi Ekspertiza Elmi-Tədqiqat İnstitutunun direktoru,  daha sonra Diplomatiya Kollecində (Avrasiya Universiteti) prorektor olub. Cinayət hüququ və məhkəmə icraatı üzrə elmi məqalələrin və monoqrafiyaların müəllifidir.

Qeyri-rəsmi mənbələrə görə, İ.Rəhimov Vladimir Putinin kurs yoldaşı və şəxsi dostudur.

Formal olaraq İ.Rəhimov biznesə 1999-cu ildə, Vladimir Putin RF baş naziri təyin olunduqdan sonra gəlib. O zaman Bakıda Diplomatik Kollecin prorektoru postunu tərk edərək “LUKoyl-Azərbaycan”ın hüquq şöbəsinə rəhbərlik edib. Müsahibələrdən birində o, etiraf edib ki, onun əsas işi Rusiyada daşınmaz əmlakla əlaqəlidir.

"Forbes" nəşrinin məlumatına görə, İ.Rəhimov Moskvada bir neçə Ticarət mərkəzinin ("Avropa", "Sadovod", "Qrand") və dəbdəbəli mehmanxanaların ("Ukrayna"), dövriyyəsi yüz milyonlarla dollar olan Antipin Neft Emalı Zavodunun sahiblərindən biridir. O həmçinin "Kiyev meydanı" şirkətinin həmtəsisçisidir. Bəzi məlumatlara görə, həmin şirkətlərdəki paylarını satıb.

Hazırda “Forbes” İ.Rəhimovun şəxsi sərvətini 400-500 mln. dollar həcmində dəyərləndirir.

Bu günə qədər İ.Rəhimovun adı rəsmi mənbələrdə az-az keçirdi, indi isə hakimiyyət onun 70 illiyi ərəfəsində xidmətlərini yada salıb. -02D-