Putinin Əliyevlə Görüşdə Qarabağdakı vəziyyət haqqında dedikləri

Moskva/22.02.22/Turan: Rusiya prezidenti Vladimir Putin fevralın 22-də Kremldə Azərbaycan prezidenti İlham Əliyevlə görüşdə Dağlıq Qarabağdakı vəziyyətə və Rusiyanın roluna toxunub.

"Artıq orada yaşayan bütün insanların təhlükəsizliyinin təmin edilməsi nöqteyi-nəzərdən və ticari-iqtisadi əlaqələrin inkişafı, nəqliyyat kommunikasiyalarının açılması ilə bağlı müəyyən razılaşmalar var.

Bilirəm ki, hələ mübahisələr də var, üzərində işlənəcək məsələlər var. Amma biz öz tərəfimizdən bu prosesin dinc vasitələrlə, dinc yolla inkişaf etməsi üçün və bu prosesə cəlb edilmiş bütün tərəflərin razı qalmasına nail olmaq üçün əlimizdən gələni edəcəyik", deyə RİA agentliyi Putindən sitat gətirir.

Əliyev öz növbəsində qeyd edib ki, Rusiya Azərbaycan və Ermənistan arasında müharibənin başa çatmasında çox mühüm rol oynayıb.

"Rusiya Azərbaycan və Ermənistan arasında münasibətlərin normallaşmasında, normal qonşuluq münasibətlərinin qurulmasında əsas rolu oynayır", deyə o qeyd edib.

Görüş başa çatdıqdan sonra iki liderin imzaladığı sənədə toxunan Putin Mütəffiqlik haqqında Bəyannamənin ikitərəfli münasibətlərdə yeni mərhələ olduğunu deyib. -02D-