"Qanlı Yanvar"ın 29-cu ildönümünün keçirilməsi ilə bağlı tədbirlər planı təsdiq edilib

Bakı/03.01.19/Turan: "20 Yanvar faciəsinin iyirmi doqquzuncu ildönümünün keçirilməsi ilə bağlı tədbirlər planı" Azərbaycan Prezidenti Administrasiyasının rəhbəri Ramiz Mehdiyev tərəfindən təsdiq edilib.

Sənəddə ölkənin şəhər və rayonlarında, o cümlədən idarə və təşkilatlarında 20 Yanvar hadisələrinin mahiyyətini əks etdirən konfrans, toplantı və mühazirələrin təşkili, mədəniyyət ocaqlarında faciəyə həsr olunmuş tamaşaların, bədii və sənədli filmlərin nümayiş etdirilməsi nəzərdə tutulur.

Bundan başqa, dünya ictimaiyyətinin diqqətini bu faciəyə yönəltmək məqsədilə Azərbaycanın xarici ölkələrdəki diplomatik nümayəndəlikləri və icmalarının dünyanın aparıcı KİV-lərində kütləvi informasiya vasitələrində, 20 Yanvar hadisələri barədə xarici dillərdə materialların hazırlanması və yayılmasının təmin olunması barədə tapşırıqlar verilib.

Respublikanın bütün tədris müəssisələrində faciəyə həsr edilmiş xüsusi dərs keçiriləcək, 20 Yanvar şəhidlərinin ailələrinə humanitar yardımlar göstəriləcək, faciə qurbanlarının xatirəsinə həsr olunan dini mərasimlər təşkil ediləcək.

Yanvarın 20-də Şəhidlər xiyabanına ziyarətin təşkili, saat 12.00-da bütün ölkə ərazisində şəhidlərin xatirəsinin bir dəqiqəlik sükutla yad edilməsi, hüzn əlaməti olaraq dövlət bayraqlarının endirilməsi və s. tədbirlər planlaşdırılır.

* 1990-cı il yanvarın 20-də Sovet Ordusu milli-azadlıq hərəkatını yatırmaq məqsədilə Bakıda cəza əməliyyatı həyata keçirib. Qoşunların yeridilməsi nəticəsində 137 mülki şəxs öldürülüb, 700-dən çox insan yaralanıb, 1000-dən çox insan həbs olunub. -06D-