Qarabağ münaqişəsinin başa çatması Qara Dəniz İqtisadi Əməkdaşlıq regionunda əməkdaşlıq üçün yeni imkanlar açır

Bakı/30.06.21/Turan:  30 ilə yaxın işğal altında olan ərazilərini azad edən Azərbaycan hazırda Ermənistanla dövlət sərhəddi boyunca sərhəd nəzarəti infrastrukturunu yaradır. Bu barədə xarici işlər naziri Ceyhun Bayramov Qara Dəniz İqtisadi əməkdaşlıq Təşkilatı ölkələri Xarici İşlər Nazirləri Şurasının 43-cü iclasında çıxışı zamanı bildirib.

"Biz Ermənistana sərhədlərin delimitasiyası və demarkasiyası ilə bağlı ikitərəfli danışıqlara başlamağı təklif edirik. Azərbaycan Ermənistandan müsbət cavab gözləyir", - Bayramov deyib.

O qeyd edib ki, Ermənistan minalanmış ərazilərin xəritələrini təqdim etməlidir.

Azərbaycanlı nazirin dediyi kimi, münaqişənin nizamlanması regional əməkdaşlıq, inkişaf və tərəqqi üçün yeni perspektivlər açır.

O, Zəngəzur dəhlizinin açılması məsələsinə də toxunub.

"10 noyabr 2020-ci il tarixli birgə bəyanat regionda kommunikasiyaların açılmasını nəzərdə tutan 11 yanvar 2021-ci il tarixli Azərbaycan-Rusiya-Ermənistan üçtərəfli bəyanatı ilə tamamlanıb. Bu tədbirlərin reallaşması Qara dəniz İqtisadi Əməkdaşlıq regionunun mühüm hissəsinin - Cənubi Qafqazın landşaftını əhəmiyyətli dərəcədə dəyişəcək.

Zəngəzur dəhlizi otuz ilə yaxın mühasirədə olan Naxçıvan eksklavını  Azərbaycanın qalan hissəsi ilə birləşdirəcək və Azərbaycanla Türkiyə arasında yeni birləşdirici halqanı təmin edəcək.

“Kommunikasiyaların bərpası bütün bölgə üçün uduşlu bir vəziyyətdir və daha geniş Qara dəniz coğrafiyasının əhəmiyyətini artıracaq", - Bayramov deyib.

O ümidvar olduğunu bildirib ki, silahlı qarşıdurmanın sona çatması ilə yaranan sülh, təhlükəsizlik və əməkdaşlıq vizyonunu reallaşdırmaq üçün Qara dəniz İqtisadi Əməkdaşlıq Təşkilatı da daxil olmaqla, beynəlxalq birlik səylərini əsirgəməyəcək.16D-