Qarabağ separatçıları Vaşinqtonda gedən danışıqlar prosesini pozmağa çalışırlar

Bakı/28.06.23/Turan: Qarabağda separatçı rejimin qondarma "parlamenti" Vaşinqtonda olan Ermənistan Xarici İşlər Nazirliyinin nümayəndə heyətinə müraciət edərək Azərbaycanla başlanmış danışıqları təmas xəttində tam atəşkəs bərqərar olana qədər "dərhal dayandırmağa" çağırıb. Bu barədə Ermənistan KİV bildirib.

Müraciət müəllifləri Ermənistan nümayəndə heyətindən atəşin dayandırılmasına "sənədli zəmanət" alınmasını tələb edirlər. Əks halda, separatçıların fikrincə, "danışıqların davam etdirilməsi Azərbaycan tərəfinin təcavüzkar davranışının təşviq edilməsi  və beynəlxalq səviyyədə imtiyaz demək olacaq".

Separatçılar həmçinin Rusiyaya müraciət edərək "Azərbaycanın antiinsani, soyqırım əməllərinin qarşısını ən sərt tədbirlərlə almağa" çağırıblar.

“Qanunsuz rejimin parlamenti Birləşmiş Millətlər Təşkilatı Təhlükəsizlik Şurasına və ATƏT-in Minsk Qrupunun həmsədr ölkələrinin başçılarına müraciət edir, təəssüf, nəsihət və məsləhət ifadələrilə yanaşı, konkret əməli addımlar atmağa, əsasən Azərbaycana qarşı sanksiyalar tətbiq etməyə, onun təcavüzkar ambisiyalarını cilovlamağa" çağırır.

Bu gün səhər separatçılar Azərbaycan ordusunun Ağdərədə və Xocavənddə 4 erməni hərbçini məhv etdiyini bildiriblər. İyunun 28-də gecə ermənilər Ağdam rayonunun Qalayçılar kəndi istiqamətində Azərbaycanın mövqelərinə hücum ediblər, nəticədə hərbi qulluqçu Əli Şükür oğlu Bəkirov yaralanıb.

Ötən gün Vaşinqtonda Azərbaycan və Ermənistan Xarici İşlər nazirlikləri rəhbərləri arasında danışıqlar başlayıb. Danışıqlar iyunun 29-dək davam edəcək.06В