Qarabağ separatçılarının yeni lideri

Bakı/15.04.20/Turan: Qarabağda "prezident seçkilərinin" ikinci mərhələsində 84,5% səs qazanan Araik Arutyunyan qalib gəlib, xəbəri Ermənistan KİV-ləri yayıb.

Yeni lider 14 dekabr 1973-cü ildə Qarabağda dünyaya gəlib. Ali təhsilini Yerevan Xalq Təsərrüfatı İnstitutunda alıb. 10 il ərzində (2007-2017) Qarabağın "baş naziri" olub, daha sonra bir il dövlət naziri olub.

2018-ci ildə Qarabağda hakimiyyətin siyasətinə qarşı kütləvi etirazlar fonunda istefa verib.

Dərc edilmiş bioqrafiyadan Arutyunyanın müharibə zamanı Azərbaycana qarşı döyüşdüyü və 1992-ci ildə Şuşanın ələ keçirilməsinə görə mükafatı olduğu məlumdur.

Müharibədən sonrakı illərdə bank sahəsində işləyib, Qarabağ "parlamentinin" deputatı olub, "Azad vətən" partiyasını yaradıb və ona rəhbərlik edib. Bako Saakyanın yaxını və regionda ən varlı sahibkar hesab olunur. Arutyunyan Qarabağda spirtli içkilərin istehsalına və ixracına nəzarət edir.

Seçkiqabağı təşviqat zamanı Arutyunyan Qarabağın gələcəyini Ermənistanın tərkibində gördüyünü bəyan edirdi. -02D-