Qarabağda "yerli seçkilər" şoudan başqa bir şey deyil

Bakı/06.09.19/Turan: Oyuncaq rejimin Azərbaycanın işğal edilmiş ərazilərində "yerli seçkilər" keçirməsi şoudan başqa bir şey deyil. Bu barədə Azərbaycan XİN-in rəsmi nümayəndəsi Leyla Abdullayeva KİV-in sentyabrın 8-də Qarabağda "yerli özünüidarə orqanlarına seçkilər" keçirilməsi haqqında yaydığı məlumatları şərh edərkən bildirib.

"Hərbi təcavüz, işğal, etnik təmizləmə, qanunsuz əməllər halında hansı "seçki"dən danışırsansa danış, nə bu hazırlanan tamaşa, nə də onun nəticələri beynəlxalq ictimaiyyət tərəfindən tanınmır və tanınmayacaq", deyə Abdullayeva bildirib. O xatırladıb ki, bu günə kimi keçirilmiş "seçkilərlə" bağlı beynəlxalq ictimaiyyət, o cümlədən həmsədr ölkələri, bu qanunsuz əməlləri və onların nəticələrini tanımadıqlarını birmənalı şəkildə qeyd ediblər.

Ermənistan tərəfinin müxtəlif ölkələrdə erməni diaspor təşkilatları və lobbist qruplarının dəstəyi ilə təşkil olunan tədbirlərdə ölkəmizin Dağlıq Qarabağ bölgəsindəki oyuncaq rejimi təbliğ etmək səylərinə, təşkil edilən qanunsuz səfərlərə, təxribat xarakterli əməllərinə rəğmən həqiqət birdir və dəyişilməzdir. Avstraliya timsalında, bu yaxınlarda Avstraliyaya qanunsuz rejimin agentlərinin səfəri təşkil olunub və bu, sanki qondarma rejimin "tanınması" kimi qələmə verməyə çalışılıb. Bu son hadisələrdən sonra da Avstraliya XİN-i rəsmi internet səhifəsində Azərbaycanın ərazi bütövlüyünün bu ölkə tərəfindən dəstəkləndiyini və Dağlıq Qarabağın "müstəqil dövlət" kimi tanınmadığını bir daha bəyan edib.

Başqa bir misal, Almaniya XİN-i erməni mətbuatında, guya ki, qondarma rejimin Almaniyadakı torpaq seçkilərində müşahidəçi qismində iştirakına dair məlumata cavab olaraq yazılanların əsassız olduğunu Səfirliyimizə bildirib və Almaniyanın nə Dağlıq Qarabağı, nə də orada keçirilən "seçkiləri" tanımadığını vurğulayıb, deyə Abdullayeva qeyd edib. -06D-