Qarabağın azərbaycanlı icması erməni tərəfi ilə dialoqa hazırdır

Bakı/21.12.18/Tuiran:"Azərbaycanın Dağlıq Qarabağ bölgəsinin erməni və azərbaycanlı icmalarının birgə yaşayışı şəraitində ədalətli sülh, dayanıqlı regional sabitlik və təhlükəsizlik təmin oluna bilər. Bu istiqamətdə mühüm addımlardan biri kimi Dağlıq Qarabağın azərbaycanlı və erməni icmaları arasında dialoq təşviq edilməlidir.Azərbaycanın Dağlıq Qarabağ bölgəsinin azərbaycanlı icması konstruktiv dialoqa hazırdır" - "Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyinin 20 dekabr 2018-ci il tarixində keçirilmiş II qurultayının qəbul etdiyi bəyanatda deyilir.

Bəyanat müəllifləri artıq 30 ildən çoxdur ki, Qarabağ münaqişəsinin davam etməsinə səbəb kimi Ermənistan tərəfin Azərbaycana ərazi iddialarını, bir milyon nəfərdən çox azərbaycanlının köçkün vəziyyətinə salınmasını göstərirlər.

Sənəd müəllifləri bəyan edirlər ki, Ermənisatnın Azərbaycana ərazi iddialarından geri çəkilməməsi, nəzarət etdiyi Azərbaycan ərazilərindən hərbi qüvvələrini çıxarmaması problemin həllinə mane olan başlıca səbəbdir.

Bəyanatda deyilir ki, dünya birliyi və beynəlxalq qurumlar Azərbaycanın ərazi bütövlüyünü tanıyır və münaqişənin beynəlxalq normalara uyğun, ədalətli həllinin tərəfdarıdır.

Müəlliflər hesab edirlər ki, Ermənistanın əsaslandığı xalqların öz müqəddəratını təyinetmə hüququ digərlərinin hüquqlarının pozulmasını, zorakılıq əməllərinin törədilməsini heç bir halda qəbul etmir, əks halda isə qəbul olunmur.

Sənəd müəlliflərinə görə, münaqişənin ədalətli həllinə nail olmaq üçün Ermənistan qoşunları Azərbaycanın işğal olunmuş ərazilərindən çıxarılmalı, məcburi köçkünlər, o cümlədən Azərbaycanın Dağlıq Qarabağ bölgəsinin azərbaycanlı əhalisi öz doğma torpaqlarına - Dağlıq Qarabağa təhlükəsiz və ləyaqətli şəkildə qayıtması, mülkiyyət hüquqlarından istifadə olunması təmin olunmalıdır.

Bəyanat müəllifləri beynəlxalq ictimaiyyətə, xüsusilə ATƏT-in Minsk Qrupunun həmsədr ölkələrinə müraciət edərək Azərbaycanın Dağlıq Qarabağ bölgəsinin azərbaycanlı və erməni icmaları arasında təmasları dəstəkləməyə çağırır.

Xatırladaq ki, qurultayda icmanın yeni rəhbərliyi müəyyən edilib. Quruma XİN əməkdaşı Tural Gəncəliyev rəhbərlik edir.-05D-