Qarabağın azərbaycanlı icması erməni tərəfi ilə əlaqələrə hazırdır

Bakı/18.01.19/Turan: Dağlıq Qarabağın azərbaycanlı icmasının rəhbəri Tural Gəncəliyev ATƏT-in Minsk Qrupu həmsədrlərinin Azərbaycan və Ermənistan XİN rəhbərlərinin Paris görüşünün yekunlarına dair bəyanatını alqışlayıb.

Dağlıq Qarabağın azərbaycanlı icması erməni və azərbaycanlı icmaları arasında konstruktiv dialoqun aparılması və əlaqələrin qurulmasının tərəfdarı kimi çıxış edir. Bu barədə T.Gəncəliyevin KİV-ə daxil olan şərhində deyilir.

O, Qarabağın de-fakto hakimiyət nümayəndəsi David Babayanın bəyanatını şərh edərkən deyib: "Babayana xatırlatmaq istərdim ki,

münaqişənin tərəfləri kimi Ermənistan və Azərbaycan, maraqlı tərəfləri qismində isə Azərbaycanın Dağlıq Qarabağ bölgəsinin erməni və azərbaycanlı icmaları müəyyən edilib . Bu, ATƏM Nazirlər Şurasının 1992-ci ildə Helsinkidə keçirilmiş görüşündə qəbul edilmiş sənədlə təsbit edilib.

Ona görə də, maraqlı tərəf kimi yalnız Dağlıq Qarabağın erməni icmasından danışmaq və azərbaycanlı icmasını görməməzdikdən gəlmək Paris görüşündə səsləndirilmiş bəyanatın ruhuna ziddir və konstruktivlik mühitinin yaradılmasına kömək etmir".

"Hesab edirik ki, icmalararası dialoq və əlaqələr hər iki tərəfin əhalisinin sülhə, təhlükəsizliyə və dayanıqlı regional inkişafa hazırlanması yollarının müzakirəsi müstəvisində xüsusi əhəmiyyət kəsb edir.

Dağlıq Qarabağın azərbaycanlı icması tezliklə münaqişənin sülh yolu ilə tənzimlənəcəyinə və erməni icması ilə birgə yaşayışın təmin ediləcəyinə ümid edir", - T.Gəncəliyev vurğulayıb.-02D-