Qarabağlı xadim Bakıya Sərsəng su anbarının birgə istifadəsini təklif edir

Bakı/10.04.19/Turan: Qarabağ "hökuməti"nin keçmiş rəhbəri və Azad Vətən Partiyasının lideri Araik Arutyunyan regionda sabitliyin və davamlı sülhün bərqərarını təklif edib.

O, Facebook səhifəsində yazıb ki, beynəlxalq uçuşlar üçün Qarabağ hava məkanının açılmasını təklif edir.

Bundan əlavə, A.Arutyunyan Azərbaycanla birlikdə Sərsəng su anbarının istifadəsini təklif edir.

Razılıq əldə olunarsa sərhədyanı rayonlarda minlərlə hektar torpaq suvarılacaq ki, bu da əhalinin həyat səviyyəsini kardinal şəkildə dəyişəcək.

Onun fikrincə, bu təkliflər Azərbaycan və Ermənistan XİN rəhbərlərinin qarşıdakı görüşündə müzakirə oluna bilər. Arutyunyan bildirib ki, vaxtilə bu təkliflər BQXK və ATƏT-in Minsk Qrupu həmsədrlərinin vasitəsilə Azərbaycan hakimiyyətinə təqdim olunub, lakin Bakı tərəfindən qəbul edilməyib.

Xatırladaq ki, Qarabağ üzərində hava məkanı Azərbaycan ərazisi sayılır və onun razılığı olmadan orada beynəlxalq aviareyslər mümkün deyil. Bakı dəfələrlə bildirib ki, Ermənistan-Azərbaycan münaqişəsi nizamlanmayınca bu cür uçuşların həyata keçirilməsinə imkan verilməyəcək.-02D-