Qazax rayonunun bir müddət əvvəl işğaldan azad edilmiş Qızılhacılı kəndində 4 nəfər minaya düşüb

Cümə günü 30 ildən artıqdır ki, Ermənistanın işğalı altında olan və bu yaxınlarda Ermənistan tərəfindən Azərbaycana qaytarılan Qazax rayonunun Qızılxacılı kəndində mina partlayışı baş verib, bu barədə avqustun 2-də Baş Prokurorluq, Dövlət Sərhəd Xidməti və Minatəmizləmə Agentliyinin (ANAMA) birgə yaydığı bəyanatda deyilir.

Hadisə nəticəsində Azərbaycan Respublikası Dövlət Sərhəd Xidmətinin hərbi qulluqçusu gizir Əhədli Xəyal Ədinəqulu oğlu və Minatəmizləmə Agentliyinin əməkdaşı Mehdizadə Afiq Müşviq oğlu minatəmizləmə işləri zamanı xidməti vəzifələrini icra edərkən piyada əleyhinə minaya düşüb. Partlayış nəticəsində hər ikisi ayaq nahiyəsindən xəsarət alıblar.

Eyni zamanda, agentliyin əməkdaşları Ələkbərov Elçin  və Mirzəyev Yavər qəlpə yaraları alıblar. Xəsarət alan şəxslər ilkin tibbi yardım göstərilməklə dərhal xəstəxanaya çatdırılıblar. Həyatları üçün təhlükə yoxdur.

Hazırda Şəmkir hərbi və Qazax rayon prokurorluğunun əməkdaşları tərəfindən hadisə yeri müayinə olunur və digər zəruri prosessual hərəkətlər icra edilir.

*Xatırladaq ki, mayın 24-də Qazaxın Qızılhacılı kəndi və daha üç kəndi 30 illik erməni işğalından sonra Azərbaycana qaytarılıb.