REAl-ın qurultayı barədə

Bakı/09.04.18/Turan: Respublikaçı Alternativ Partiyasının (REAL) təsis qurultayının online rejimində keçirilməsi hakimiyyətin maneçiliyi səbəbindən məcburi tədbir idi. Bu barədə bugünkü mətbuat konfransında bildirilib.

"Hökumət başqalarına açdığı qapıları bizim üzümüzə qapadıb, ancaq başa düşməlidir ki, demokratiya üçün imkanlar tükənməzdir. İradə hər şeydən güclüdür", - REAL Məclisinin üzvü Natiq Cəfərli bildirib.

Online müzakirələrdə 250 nümayəndə iştirak edib. "Biz açıq səsvermə yolu ilə partiyanın yaradılması barədə qərar qəbul etdik, irəli sürülən təkliflər nəzərə alınmaqla proqramı və nizamnaməni təsdiq etdik", - o vurğulayıb.

Qurultayın ikinci mərhələsində, aprelin 8-də REAL-ın mənzil-qərargahında gizli səsvermə yolu ilə partiya rəhbər orqanlarının seçkisi keçirilib. Səsvermədə 190 nümayəndə iştirak edib. Nümayəndələrin bir hissəsi müvəqqəti olaraq xaricdə yaşayır və işləyir, ezamiyyətdədir. Odur ki, onlar səs verə bilməyiblər.

İlqar Məmmədovun böyük nüfuzu nəzərə alınaraq heç kim sədr postuna öz namizədliyini irəli sürməyib və o, yekdilliklə seçilib.

Partiya Məclisi üzvlüyünə (40 yer) 61 namizəd irəli sürülüb. Çox səs toplayanlar seçiliblər.

N.Cəfərlidən başqa politoloq Azər Qasımlı, hüquqşünaslar Erkin Qədirli, Xalid Bağırov, hüquq müdafiəçisi Rəsul Cəfərov, hərbi ekspert Cəsur Sümərinli və digərləri partiya Məclisinin üzvləri seçiliblər.

Bundan sonra Məclis özü 11 nəfərlik İdarə Heyətini formalaşdıracaq.

Partiya Azərbaycanın parlament respublikasına çevrilməsinə tərəfdardır və bütün seçkilərdə iştirak etmək niyyətindədir.06D--