Rəsmi Bakı Dunya Miyatoviçə cavab verib

Bakı/27.04.21/Turan: Aprelin 20-də Avropa Şurasının insan hüquqları üzrə komissarı Dunya Miyatoviç Ermənistan-Azərbaycan münaqişəsinə və onun nəticələrilə bağlı Azərbaycan prezidenti İlham Əliyevə məktub göndərib.

Əsasəm Miyatoviç yazır ki, "barışıq və davamlı sülh yolunu təmin etmək üçün keçmişin aradan qaldırılması prioritet olmalıdır", "zərər çəkmiş əhalinin yaşadığı yerlərə beynəlxalq humanitar və hüquq- müdafiə təşkilatlarının daimi, sərbəst və maneəsiz çıxışını təmin etmək son dərəcə vacibdir.Bu, nəinki kömək və bərpa etmək üçün, həm də insan hüquqlarının, münaqişə qurbanlarının və onların ailələrinin müdafiəsi üçün lazımdır".

Daha sonra o, Bakıda Hərbi Qənimətlər Parkının açılmasından təəssüflənir. Onun sözlərinə görə, orada "ölü və ölməkdə olan erməni əsgərlərin" mum manekenləri təsvir olunub.

"Mən bu cür təsvirləri çox həyəcanlı və alçaldıcı hesab edirəm. Bu cür təzahürlər yalnız uzunmüddətli düşmənçiliyi daha da gücləndirə və dözümsüzlük təzahürlərinə kömək edə bilər və icmalar arasında əsl barışıq şansını məhdudlaşdıra bilər", - Miyatoviç yazır.

"Mən sizi öz nüfuzunuzdan istifadə etməyə, düşmənçiliyin və nifrətin qızışdırılmasına səbəb olan hər hansı ritorika və ya hərəkətlərə qarşı sərt mövqe tutmağa və Azərbaycanla Ermənistan arasında sülh və barışığa yardım etmək üçün səylərə tam siyasi dəstək verməyə çağırıram", - məktubda qeyd olunur.

Sonda Miyatoviç əgər ona "insan hüquqlarına aidiyyatı olan" bütün yerləri ziyarət etmək hüququna zəmanət verilərsə, Azərbaycana gəlməyə hazır olduğunu bildirir.

Aprelin 27-də Azərbaycan Xarici İşlər Nazirliyi bu müraciətə cavab verərək  Avropa Şurası komissarının Azərbaycanın dinc şəhərlərinin ermənilər tərəfindən raket atəşinə tutulmasına və müharibə dövründə onlarla insanın həlak olmasına heç bir reaksiya verməməsindən təəssüfləndiyini bildirib.

“Avropa Şurasının insan hüquqları üzə komissarının son aylarda Ermənistanla Azərbaycan arasındakı münaqişə ətrafında baş verən insan haqları ilə əlaqəli son inkişafları izləməyə göstərdiyi marağı nəzərə alaraq vurğulamaq istərdik ki, münaqişə 30 ilə yaxın davam edib, nəhəng humanitar əziyyətlərə səbəb olub və yüz minlərlə azərbaycanlının insan haqlarının kütləvi pozuntuları ilə müşayiət olunub. Lakin bütün bu iztirablar və hüquq pozuntuları “Komissarın mandatına aid olmaması” bəhanəsi ilə həm hazırkı komissarın, həm də onun sələflərinin nəzərindən kənarda qalıb.

Azərbaycan torpaqlarının azad edilməsi nəticəsində Ermənistanın qanunsuz işğal illərində bu ərazilərdə törətdiyi böyük miqyaslı dağıntılar üzə çıxıb. Düşünülmüş siyasətin bir hissəsi kimi, yüzlərlə tarixi abidə, onlarla muzey, məscid və mədəni irs nümunələri dağıdılıb, talan edilib və vandalizmə məruz qalıb. İşğal olunmuş ərazilərdəki qədim məscidlərin təhqir olunaraq donuz tövləsinə çevrildiyi, müqəddəs məkanlara münasibətdə rüsvayçı davranışı əks etdirən görüntülər və videolar təəssüf ki, çoxdur.

Bundan əlavə, 44 günlük müharibə müddətində beynəlxalq humanitar hüququ açıq şəkildə pozmaqla Ermənistan bir sıra dəhşətli müharibə cinayətləri törədib. Cəbhə bölgəsindən uzaqda yerləşən və sıx  məskunlaşmış Gəncə və Bərdə şəhərlərində yaşayış məntəqələrinin, eləcə də Azərbaycanın digər şəhərlərinin ballistik raketlərlə atəşə tutulması yüzdən çox günahsız mülki şəxsin öldürülməsi ilə nəticələnib.

Yenə də bütün bu dəhşətli faktlara Avropa Şurasının insan hüquqları komissarı tərəfindən təəssüf ki, məhəl qoyulmayıb. Heç kimsə mülki əhalinin həyatına və hüquqlarına birbaşa təsir edən bu kimi məsələlərin Komissarın mandatına aid olmadığını iddia edə bilməz.

Qeyd olunanların fonunda, komissar görünür ki, sözügedən “mandat" tərəfindən qoyulan məhdudiyyətləri unudaraq, siyasi motivli məsələlərə maraq göstərməyə başlamışdır. Əslində bu, Avropa Şurasının müxtəlif qurumları tərəfindən Azərbaycanın tez-tez məruz qaldığı ikili standart və selektiv yanaşmanın başqa bir təzahürüdür.

Ermənistanla Azərbaycan arasındakı qarşıdurmanı “millətlərarası düşmənçilik” və ya “Dağlıq Qarabağda və ətrafında yaşayan etnik icmalar arasındakı şiddətli münasibətlər” kimi təsvir etmək cəhdi çox böyük yanlışlıqdır. Qeyd etmək istərdik ki, münaqişə Azərbaycana qarşı əsassız ərazi iddiaları əsasında, soyqırımı, etnik təmizləmə, insanlığa qarşı digər cinayətlər və ən ağır müharibə cinayətləri də daxil olmaqla dəhşətli cinayətlərlə müşayiət olunub. Bundan əlavə, Komissara xatırlatmaq istərdik ki, məktubunda bəhs etdiyi “Dağlıq Qarabağda və ətraf rayonlarda yaşayan etnik icmalar” anlayışı mövcud deyil, çünki Ermənistanın bədnam etnik təmizləmə siyasəti nəticəsində bu ərazilərdə ermənilərdən başqa heç bir “etnik icma” mövcud olmayıb. Avropa Şurası Parlament Assambleyası hələ 2005-ci ildə qəbul etdiyi 1416 saylı qətnaməsində “əhalinin kütləvi şəkildə qovulması və dəhşətli etnik təmizləmə konsepsiyasına bənzər monoetnik ərazilərin yaradılması” ilə bağlı narahatlığını dilə gətirmişdi.

Bakıdakı Hərbi Qənimətlər Parkının açılışına görə komissarın "təəssüf bildirməsi" də eynilə əsassızdır. Qənimətlər Parkı on illərdir davam edən təcavüz və etnik təmizləmə siyasəti üzərində beynəlxalq hüququn və ədalətin təntənəsinin rəmzidir. Azadlıq, suverenlik və ərazi bütövlüyü uğrunda müharibədəki qələbəni ölümsüzləşdirmək, Avropa Şurası bölgəsi də daxil olmaqla, bir çox xalqlar tərəfindən geniş tətbiq olunan bir təcrübədir. Park, dünyanın digər guşələrindəki bənzətmələr kimi, irqçiliyin, ayrı seçkiliyin və dözümsüzlüyün uğur qazanma şansının olmadığını açıq şəkildə xatırladır. Bura indiki və gələcək nəsillər üçün təcavüz və dözümsüzlük siyasətinin təhlükələri haqqında bir təhsil yeridir və həqiqəti axtarmaq üçün müvafiq məkandır.

Millətlərin müstəmləkə keçmişini təriflədikləri və müstəmləkə edilmiş xalqlara qarşı dəhşətli cinayətlərə dair dəlillərin nümayiş etdirildiyi “humanizmdən uzaq səhnələr” və ya “narahatedici və alçaldıcı görüntülər” Avropa Şurasının digər yerlərində axtarılmalıdır.

Müharibə bitdikdən beş ay sonra, hələ də Ermənistan cəmiyyətində nifrət və Azərbaycanofobiya təzahürü müşahidə olunur. Azərbaycanla barışıqdan və dinc yanaşı yaşamaqdan danışmağa cəsarət edən hər kəsin “xain” kimi qəbul edildiyini və təhqiramiz şəkildə “azərbaycanlı” və tTürk” adlandırıldığını görmək narahatlıq doğurur. Üstəlik, məsuliyyətsiz və təhlükəli revanşizm və dözümsüzlük fikirləri dövlət səviyyəsində təbliğ olunur və təəssüf ki, Ermənistandakı bütün siyasi spektrdə paylaşılır.

Bütün bu qınanmalı gedişat, o cümlədən Ermənistan hakimiyyət orqanlarının Azərbaycana və azərbaycanlılara münasibətdə irqçi yanaşmasına görə hər hansı bir erməni məmuruna qarşı cəza tədbirinin görülməməsi bu günədək Komissarın diqqətindən kənarda qalıb. Azərbaycan ictimaiyyəti Komissarın Ermənistan rəsmiləri tərəfindən bu cür açıq dözümsüzlük, irqçilik və ayrı-seçkilik təzahürləri ilə bağlı atdığı addımlardan xəbərsizdir.

Beləliklə də, 20 aprel 2021-ci il tarixli məktubunun Komissarın işinin müstəqilliyi və qərəzsizliyini şübhə altına aldığı və bunun komissarın ofisi ilə Azərbaycan arasındakı münasibətlərə mənfi təsir göstərə biləcəyi vurğulanmalıdır. Üstəlik, məktubun qərəzsiz bir müraciətdən çox uzaq olması, onun “barışıq və barışığın təşviq edilməsi” kimi nəcib hədəfə zidd olduğunu açıq şəkildə nümayiş etdirir. Əksinə, bu, bölgədə mehriban qonşuluq münasibətləri qurmaq prosesini riskə atan revanşist dairələri cəsarətləndirir.

Azərbaycan komissarı mandatının tələb etdiyi kimi qərəzsiz olmağa və Avropa Şurasının nüfuzuna xələl gətirəcək hərəkətlərdən və açıqlamalardan çəkinməyə çağırır”, - Azərbaycan Xarici İşlər Nazirliyinin cavabında deyilir. -02D-