RF XİN milliyyətcə erməni olan Rusiya vətəndaşlarına qarşı diskriminasiyaya görə Bakını tənqid edir

Moskva/11.01.19/Turan: Moskva ümid edir ki, Bakı milliyyətcə erməni olan Rusiya vətəndaşlarına qarşı diskriminasiya siyasətinə son qoyacaq və onların Azərbaycana səfərinə əngəl törətməyəcək. Bu barədə Rusiya XİN İnformasiya və Mətbuat Departamentinin direktoru Mariya Zaxarova cümə günü Moskvada brifinqdə bildirib.

"Əgər statistikadan danışsaq, bizə məlum olub ki, ötən il etnik əlamətinə gorə Rusiya vətəndaşlarının Azərbaycana səfərindən imtina edilməsilə bağlı minimum 16 hadisə baş verib", - o davam edib. Rusiya vətəndaşları aeroportda saatlarla saxlanılıb, sonradan rəsmi səbəblər göstərilmədən ölkədən çıxarılıblar".

"Təəssüf ki, bu cür hallar artıq yaxşı olmayan və qeyri-düzgün ənənəyə çevrilir", - diplomat qeyd edib. Bizim fikrimizcə, sözügedən faktlar RF vətəndaşlarının hüquqlarının kobud şəkildə pozulmasıdır və dostluq, əməkdaşlıq və qarşılıqlı təhlükəsizlik haqqında Rusiya-Azərbacan müqaviləsinə, vətəndaşların vizasız səfərlərinə dair hökumətlərarası sazişə, Rusiya və Azərbaycan arasında dostluq və strateji tərəfdaşlıq haqqında bəyannaməyə ziddir".

Onun sözlərinə görə, Rusiya tərəfi "dəfələrlə Azərbaycan tərəfinin diqqətini yaranmış vəziyyətin məqbul olmadığına yönəldib, saxlanma və ölkədən çıxarılma praktikasına son qoyulmasını tələb edib, çünki bu, iki ölkə arasında dost münasibətlərlə bir araya sığmır".

"Azərbaycan rəhbərliyilə əlaqələr zamanı vəziyyətin düzələcəyini bildiriblər və biz buna çox ümid edirik", - M.Zaxarova vurğulayıb.-02D-